新手媽媽變老手媽媽 兩胎小孩嘅3個差別待遇

有第一胎嘅時候，無論係陀緊又好、出咗世都好，新手媽媽總係會小心翼翼照顧BB，最怕一有閃失會令BB受到傷害，甚至一刻都唔捨得放手畀人幫手湊BB；但係由第二胎起，身經百戰嘅媽媽就會放鬆得多，甚至覺得最好有人幫手湊BB，自己可以好好休息！

1.陀住BB嘅飲食

陀住第一胎，媽媽對食嘢會好小心，記住一大堆自己食得同唔食得嘅食物，戒口戒得好清；當陀住第二胎，顧慮就少咗好多，除咗會危害到BB嘅食物如軟雪糕或魚生等，其他要戒口嘅食物都會偷食少少，最緊要自己開心先！

2.BB唔舒服

第一胎嘅BB只有少少狀況都足以嚇到新手媽媽心慌慌，會好緊張咁即刻上網搵資料，問下其他媽媽嘅處理方法同意見；當媽媽照顧第二胎嘅時候就會冷靜好多。

3.BB喊

新手媽媽喺生完第一胎後，會好想自己全天候照顧BB，一刻都唔想同BB分開，一聽到BB喊就會忍唔到即刻衝去抱住BB嚟哄；當第二胎BB喊嘅時候，媽媽會覺得畀BB喊多一陣都冇壞，如果呢個時候有人幫手哄BB，媽媽仲會好樂意將BB拱手相讓，最好畀自己休息下。

Text: Mami Editorial