湊B謝絕旁人指指點點 路人辣㷫媽媽嘅8句說話

媽媽帶住BB出街，有時會吸引途人嘅目光，撩下BB玩無傷大雅，但過分八卦，七嘴八舌就唔需要。遇到呢啲情況，媽媽真係想大叫：「BB係我嘅，點樣湊由我話事，唔使你理！」路人甲講起以下8句說話尤其辣㷫媽媽。

1. 「BB好瘦／好肥喎」

路人甲最鍾意評論BB嘅身形，不論係瘦或肥，好似只要唔係中等身形就會畀佢話太瘦或太肥，仲要關心埋BB嘅飲食習慣。其實個個BB嘅體質同吸收能力都唔同，體形又同遺傳有關，只要BB健健康康，瘦啲同肥啲都冇問題。

2. 「著咁多／咁少衫」

除咗身形，BB著幾多衫都成為路人甲嘅焦點，著得多又話著咁多，著得少又話BB唔夠暖。著衫視乎天氣同BB嘅身體狀況，唔通夏天都將BB包到實？有BB撞啱唔舒服咪著多件衫，免得又病過，呢啲背景路人甲點會知。

3. 戴頭飾都問「係男定女」

生女嘅媽媽應該成日畀人問BB嘅性別，只要BB少啲頭髮就畀人當係男仔，明明著粉紅色衫、戴住頭飾都問係男定女，有啲甚至直接當BB係男仔，媽媽都唔知要講幾多次。

4. 「咁大個仲唔識行」

BB去到差唔多要行又未識行嘅階段，路人甲就會好關心點解BB仲未識行。每個BB嘅發展都唔同，有啲未夠12個月已經識行，有啲成15個月都未行得好穩，只要BB發展正常唔需要去比較。

5. 「咁少頭髮嘅」

唔係個個BB都有濃密嘅頭髮，邊個媽媽唔想BB頭髮多啲，好多BB都係頭髮稀疏，大個自然多啲頭髮。最怕路人甲話完BB咁少頭髮之後，又問點解唔幫BB剃頭。

6. 「點解唔笑嘅」

BB笑唔笑、幾時笑都唔係我哋可以控制，確係有BB特別鍾意笑又表情多多。當BB冇表情時，路人甲會話佢唔笑，媽媽幾想同佢講：「見到你唔想笑！」

7. 「塊面做咩事」

BB嘅皮膚問題好棘手，好多BB都畀濕疹困擾，唔係咁容易斷尾，出現喺塊面度係礙眼，但媽媽見到BB皮膚唔好又唔舒服都不知幾心痛，路人甲仲問BB塊面做咩事，就好似喺傷口灑鹽。

8. 「唔使做湊BB幾好」

全職媽媽成日畀人以為只係湊BB好爽，如果冇人分擔，做家務、煮飯、湊BB一腳踢。即使只係湊BB 都唔簡單，路人甲講到咁輕鬆，佢湊一日試下就知道。

Text: Mami Editorial