有3件只有陀住BB嘅時候先可以做嘅事，媽媽們做過幾多樣？

十月懷胎，BB喺自己肚入面嘅時間，係媽媽們好寶貴嘅回憶，心思思想影大肚靚相，或者想試下其他開始流行嘅留念方式，好正常呀。

1. 影輯大肚寫真

陀B嗰時，孕媽媽嘅身體曲線，係母愛偉大嘅象徵。好多媽媽生完BB，諗番轉頭，都唔敢相信個肚曾經脹到咁大，好似發左場夢咁，所以其實真係好值得影多啲相留念㗎。

無論係搵專業攝影師拍輯相又好，自己用電話或者相機拍低日常生活照都好，都要影多啲呀。之後如果懷念胎動或者大肚嘅感覺，都有得睇番啲相。

2. 大肚彩繪

近年歐美流行大肚彩繪，喺亞洲嘅孕媽媽圈子中都開始流行喇。其實係由彩繪師，喺媽媽肚皮上面，用專用顏料畫上圖案。好多孕媽媽都會畫完直接影埋大肚相。彩繪的確可以令孕媽媽圓圓嘅肚皮再靚啲，不過孕媽媽記得要留意顏料嘅成份，為左BB著想，要留意選用嘅係咪對人體無害嘅皮膚專用顏料呀。

3. 3D 打印胎兒服務

好多爸媽都當定期檢查係同BB嘅約會，因為照超聲波嘅時候，可以見到BB嘅影像。而3D打印胎兒服務，係將掃描嘅數據，經過電腦處理後，用3D打印格式印出胎兒模型。如果睇到影像係個約會，3D打印胎兒服務就係其中一種約會嘅紀念品喇。

依家陀緊BB嘅媽媽，你又會唔會考慮用呢幾種紀念方法呀？

Text: Mami Editorial

Photo Source: Pinterest