做媽媽後會慢慢養成5個師奶特質！晉身師奶行列樣樣都係錢 最緊要學識精打細算

成為家庭主婦後，終於知道柴米油鹽係咩價位，為咗將有限金錢發揮最大作用，媽媽們都學識知慳識儉，成為持家有道嘅賢妻良母！正式向出色嘅師奶之路邁進一大步嘅各位，以下呢5種特質大家又擁有未呢？

1.買嘢會講價

以前買嘢都會乖乖照畀實價，覺得講價嘅師奶實在太丟臉。但係當做咗媽媽之後，連面皮都會跟住變厚埋，可以講價嘅就講咗先，平得1蚊得1蚊，慳返少少買嘢畀BB都好吖！

2.慳到錢就最開心

「平幾蚊畀你！」仲好聽過「你個樣好似18歲！」實際大於一切嘅媽媽，已經唔在意自己嘅外貌，只在乎銀包有幾多錢剩，買咩都會走幾間鋪頭格價，一見到慳咗錢就會興奮到癲！

3.唔願意買奢侈品

名牌雖然吸引，但價格絕對唔親民。對媽媽嚟講，與其用一個天價買一個睇得唔整花得嘅袋，不如買返個大大嘅雜嘜牌袋仲實際！（不過人哋送嘅又唔同講法！）

4.著衫只講求舒服方便

以前貪靚到一個點，扮靚都可以用幾個鐘，但做咗媽媽後，時間就變得非常珍貴，媽媽們都寧願將時間投放喺更有價值嘅事（湊BB）上，著衫愈簡單快捷愈好，Tee加牛仔褲絕對係媽媽們至愛嘅組合。

5.好留意減價同著數

邊度有平嘢賣同有著數絕對係媽媽最想知嘅資訊，一聽到有折扣同有優惠，都會令媽媽毫不猶疑衝入去店鋪睇下先！

Text: Mami Editorial

Photo Source： Pinterest