好想快啲卸貨 3種孕後期不適令孕媽媽好難受

隨著胎兒長大，子宮會變大壓迫孕媽媽嘅下肢同骨盆腔靜脈，令孕媽媽開始出現下面3種唔舒服嘅症狀，有時真係會難頂到好想BB快啲出世，令媽媽解脫呀！

1.便秘

孕媽媽嘅便秘會隨著胎兒愈大而愈嚴重，有時會幾日冇大便，但當有便意時就會因為腸臟受壓迫而極難排便，孕媽媽可能去一轉廁所，都要成個鐘先出得返嚟！辛辛苦苦終於將便便排出嗰下，孕媽媽甚至會以為自己已經預演咗一次生仔，但最慘係便秘會繼續發生，亦會令到痔瘡問題愈嚟愈嚴重！

2.腳抽筋

喺懷孕中後期，脹大嘅子宮壓迫住孕媽媽下肢回流嘅靜眽同神經，造成血液循環不良，令孕媽媽有時會喺夜晚出現腳抽筋，腳抽筋係指小腿肌肉細胞因缺氧而導致肌肉痙攣，產生不自主抽筋、僵直同疼痛嘅現象。當抽筋起上嚟，真係令孕媽媽無助又痛苦！

3. 夜尿頻繁

有時孕媽媽喺半夜瞓覺會經常有急尿嘅感覺，咁係因為瞓喺床上雖然減輕咗子宮對下腔靜脈嘅壓迫，但就會壓迫到膀胱、增加腎血流量，所以會令到孕媽媽需要頻頻去廁所，無法一覺瞓天光而精神欠佳，每晚因為急尿而扎醒，都會好想呻句：「畀我瞓啦好冇⋯⋯」

Text: Mami Editorial