BB傷風感冒唔舒服 4個紓緩症狀方法

當BB患傷風感冒，發燒、流鼻水、咳等症狀會引起BB唔舒服而哭喊不止，令爸爸媽媽非常擔心同心痛。由於BB太細個，如果BB冇持續性發高燒或引起氣管相關嘅併發症，加上飲食如常，精神狀況亦唔錯，普遍醫生都唔建議開藥畀BB食，希望靠保守療法等BB自然康復，以BB抵抗力打勝仗。爸爸媽媽亦無需太擔心，因為BB只有接觸唔同嘅病毒同細菌，先可以產生自己嘅抗體，啟動免疫系統。爸爸媽媽亦可以用以下4個方法，幫BB紓緩傷風感冒所帶嚟嘅不適症狀。

1. 放置加濕器

喺BB身體嘅房間內放置一個加濕器，令空氣變得濕潤，BB鼻內嘅鼻水同鼻屎就唔會因乾燥而變硬，可以輕易流出，呢個時候爸爸媽媽可以用紗布輕力印去鼻水。

2.熱蒸氣暖鼻

將BB帶去浴室，打開熱水龍頭關上門，喺充滿水蒸氣嘅浴室內逗留10至15分鐘，BB吸入蒸氣可以稀釋痰液，令痰液容易排出。

3. 滴生理鹽水

當BB有鼻水或鼻塞時，爸爸媽媽可以將BB嘅頭向後仰，用生理鹽水滴入BB嘅鼻孔內，將鼻內黏稠嘅鼻水同鼻屎軟化，再用吸鼻器將鼻水同鼻屎吸出。

4.多飲水

補充水分可以降低鼻涕濃稠度，令爸爸媽媽較容易清理BB嘅鼻涕。