胎動，令孕媽媽感到奇妙同埋幸福，就算生完BB，媽媽都會好懷念㗎。

講起胎動嘅感覺，無論係孕媽媽，定係已經卸左貨好耐嘅媽媽，都會回心微笑，因為BB喺媽媽肚入面嘅時候，佢地嘅一舉一動帶比媽媽一種十分難忘又幸福嘅感覺。
究竟BB喺媽媽肚入面做緊啲咩呢？

1. 踢踢

通常懷孕到4至5個月左右，媽媽就開始感受到胎動。BB郁嘅時候，手手腳腳會撞到媽媽嘅肚皮，媽媽會感覺得到BB踢佢，有啲媽媽直頭覺得BB踢到佢痛，有啲媽媽會覺得肚皮好痕，但無論係點，孕媽媽其實都好期待同享受胎動嘅感覺。如果BB好長時間都無郁，反而令媽媽擔心呢。唔知有無媽媽都試過忍唔住用手掃吓自己個肚皮，嘈醒肚入面嘅BB呢？

2. 轉身

孕媽媽有時會見到自己個肚皮郁，就好似海上面嘅波浪咁。其實係BB喺肚入面做一啲比較大嘅動作。第一次見到嘅時候可能有少少驚，但過多幾次，就覺得好得意，亦都好期待BB再做同一個動作，咁就可以感受到呢種BB喺自己肚入面咁實在嘅感覺，同埋好想錄低呀！

3. 打嗝

大約喺懷孕28週開始，突然媽媽會感覺到肚皮有時會有規律咁跳吓跳下，有啲媽媽可能會誤以為係BB心跳。但其實係BB打嗝呀，佢地要不斷咁吞食羊水，去鍛鍊肺部呼吸，提升肺部呼吸能力。其實，打嗝就即係BB吞羊水時發出嘅聲音。

胎動會變成BB同媽媽一齊經歷嘅回憶。孕媽媽們，陀B覺得又攰又辛苦嘅時候，不妨靜心感受一下BB嘅郁動，享受一下呢種淨係懷孕媽媽先有嘅甜美幸福感覺。

Text: Mami Editorial