燃起少女之魂 媽媽嘅3個少女心滿滿舉動

以為做咗媽媽就會變得成熟啲？非也。有時BB嘅出現，更會挑起媽媽們一顆蠢蠢欲動嘅少女心，情不自禁做出以下3個行為。

1.買各種卡通精品畀BB

童裝、餐具、玩具⋯⋯但凡BB需要用嘅嘢，媽媽都會希望買返自己心愛嘅卡通人物產品，一嚟係自己私心，二嚟希望可以「毒」埋自己嘅小朋友都鍾意埋一份！想像下小朋友全用嘅都係自己心愛嘅卡通人物，成個畫面即刻變得好治癒呀！雖然做咗人阿媽，係唔應該咁幼稚買到成屋都係卡通嘢嘅，不過BB鍾意喎，媽媽都冇辦法㗎！係咪？

2.同BB打扮

見到BB細細粒又肥嘟嘟、白白滑滑，比公仔仲可愛，媽媽嘅童心都返晒嚟！當正BB係換裝公仔咁不停扮靚靚、轉新形象：卡通裝、動物裝、公主王子服都可以係BB平時嘅出街衫，一到慶祝節日更要幫BB換上唔同嘅應節服飾！

3.同BB到處自拍打卡

以前會同男朋友、閨蜜們周圍影相打卡。但做咗媽媽後，BB就係媽媽最親密嘅另一半，去邊都會孖住上！細心嘅媽媽仲會同BB齊齊著上親子裝，襯到絕咁自拍影靚相！

Text: Mami Editorial

Photo Source：Pinterest