時間過得好快，襯小朋友仲係痴身嘅時候，盡情享受，盡情陪伴吧！

有小朋友嘅你，以下嘅對白有無覺得熟口熟面咁呢？當佢地同你咁講嘅時候，你有無嘗試放低手上嘅事情，認真咁回應佢地呀？

小朋友天天長大，時間過左，就無得返轉頭，要好好珍惜同埋享受可以同佢地一齊成長嘅時間哦！

1. 「陪我玩啦」

好多外國研究，都話「玩」對小朋友黎講好重要，因為玩就係佢地嘅學習過程，學習就係佢地最重要嘅事，等同於大人嘅工作，所以「玩」真係好重要㗎！

其實喺玩嘅過程裡面，都可以加入一啲學習元素，抽啲時間陪佢地玩，小朋友又開心，又可以幫助佢地學習，亦可以加深親子關係。

2. 「過黎吖，你睇吓」

呢句說話，代表小朋友一有新發現，第一時間最想話你知。因為佢當爸爸媽媽係佢地最好嘅朋友，想第一時間同爸媽分享。當佢地長大，就會有自己嘅朋友，依家佢地放我地喺分享對象嘅第一位，一定要好好珍惜呢段時間呀。

3. 「我想同你一齊瞓呀」

雖然陪小朋友瞓真係一件睇落好輕鬆，做落可以好勞氣嘅事。但係，到佢自己講「唔洗陪我喇」嘅時候，我估我會好唔捨得，好掛住佢要我陪佢嘅嗰段時間呀，可能仲會偷偷地喊。真係諗起都唔捨得呀！

4.「好想你接我放學呀」

小朋友鍾意爸爸媽媽，所以想爸媽送佢地番學，同埋接佢地放學。盡力回應一下佢地小小嘅心靈吧！香港工作忙，要接放學真係唔易，可以同小朋友解釋一下，然後再嘗試下安排，就算只係一年一次，小朋友知道係爸媽好認真咁去想辦法安排嘅，佢地一定會好開心、好滿足。

5. 「比我試吓」

當小朋友希望嘗試，就要畀佢地去試。當然，要考慮安全，喺適合同安全嘅情況下，講解比佢地聽應該點做，跟住先畏佢地試吓自己做，而且爸媽應該喺旁邊觀察。肯去嘗試係所有事情成功嘅第一步，要欣賞佢地，千祈唔好制止佢地肯嘗試嘅動力呀。

照顧小朋友嘅起居飲食真係好忙，但係都唔好忘記要享受當中嘅過程呀。

Text: Mami Editorial