BB最愛照鏡？ 4個階段認知自我

每次將鏡放喺BB面前，BB都會好有興趣咁伸手去搶，其實對唔同階段嘅BB嚟講，鏡係幫助佢哋慢慢認知自我嘅過程。

外國有兒童心理學家曾經根據唔同月齡嘅BB喺照鏡時作出嘅反應，將BB嘅自我認知心理分為4個階段：

1.認知媽媽：

BB大約喺4個月大，鏡中最吸引佢嘅唔係自己嘅影像，而係媽媽嘅影像，BB會對媽媽影像微笑同講嘢。

2.認知同伴：

當BB喺4至6個月大，佢會發現鏡中影像嘅動作行為同自己相似，所以會將鏡中嘅自己當成另一個可以玩嘅同伴。

3.認知跟隨：

當BB喺7至12個月大我，BB會跟住自己嘅鏡像做相同動作，例如BB睇到鏡中嘅自己笑，會模仿作出相同動作，慢慢發現自己係動作嘅「發號施令者」。

4.認知自我：

1歲嘅BB能夠將自己喺鏡像嘅影像同其他BB區分，開始對自己嘅鏡像感興趣。

另外，外國亦都曾經做過一項實驗，請媽媽趁BB唔注意嘅時候，喺佢哋嘅鼻上塗上紅色粉末，然後將一塊鏡放喺佢哋面前，觀察BB會有咩反應。結果發現，約兩成15個月大嘅BB會望實鏡中嘅自己，嘗試擦去鼻上嘅粉末；所有2歲大正常健康發展嘅BB都能夠完成測試。換言之，1歲半左右嘅BB已經開始知道自己係咩樣喇！

鏡像對BB嘅自我成長有重要嘅作用，爸爸媽媽不妨多啲同BB一齊照鏡，畀BB認識下自己個樣吖！

Text: Mami Editorial