懷孕時嘅感動 3件日常小事體會人間有情

孕媽媽懷住BB嘅時候身體冇以前咁靈活，做咩都要小心翼翼，但好好彩每次另一半唔喺身邊又需要幫助嘅時候，都會遇到熱心嘅好人出手相助，其實呢個世界係好有愛㗎！

1.讓座

當個肚籮咁大，孕媽媽都會好怕去搭車，一嚟人多擠迫怕撞親個肚，二嚟啲車喺行駛期間搖嚟搖去，一個唔覺意失平衡跌低就弊傢伙！雖然十次有九次去搭車都未必有人會願意讓座，不過香港地總會有好心人，有時都會遇到啲親切嘅市民願意為孕媽媽讓出一個舒適嘅位置或座位，佢哋可以係少女、大媽、大叔、紋身漢⋯⋯有時連伯伯婆婆都會起身讓座（不過都係將座位留返畀佢哋），令孕媽媽感受到人間係有情嘅！

2. 同事幫忙搬重物

有時工作需要，又唔想麻煩到人，孕媽媽都會嘗試自己搬重物，但呢個時候，都會有唔同嘅同事（有熟有唔熟）9秒9衝過嚟大叫「等我嚟！」然後幫你安全將重物送到目的地；有時唔小心跌咗啲嘢落地下，都會有同事即刻衝過嚟幫你執返，有呢班同事真係好幸福！

3.路人媽媽鼓勵

當孕媽媽捧著個大肚行街或搭車，偶爾會遇到啲新手媽媽嘅親切問候同鼓勵，佢哋會分享自己嘅生BB經歷，仲會教定孕媽媽一啲產後護理同餵人奶嘅知識，真係好暖心呀！

Text: Mami Editorial