食太多含胡蘿蔔素食物 BB皮膚易變黃

有啲媽媽會發現BB嘅皮膚愈嚟愈黃，就會好擔心BB有黃疸或肝臟問題，但原來BB皮膚變黃係同飲食有好大關係㗎！當BB開始加固後，如果進食太多含蘿蔔素嘅食物，BB嘅皮膚就會變黃。

胡蘿蔔素係人體無法製造而必須喺食物中獲取嘅營養素。胡蘿蔔、木瓜、南瓜、蕃薯、番茄、芒果等等，都含有非常豐富嘅胡蘿蔔素。

胡蘿蔔素會經由皮膚嘅皮脂腺排出體外，但係當人體攝取過多胡蘿蔔素嘅時候，佢哋就會大量累積喺皮脂腺豐富或角質比較厚嘅地方準備排出，例如臉、手掌同腳掌等。

不過爸爸媽媽可以放心嘅係，過量累積胡蘿蔔素並唔會危害到BB嘅身體。即使BB嘅皮膚變黃咗，只要均衡飲食一段時間就可以慢慢改善返。

但爸爸媽媽亦要注意，雖然各種新鮮蔬果對BB身體有益，但都要均衡攝取各種食物嘅營養素，唔好只畀BB食嚟食去都係某幾種食物，因為除咗令BB有機會變成小黃人之外，亦會欠缺其他食物先有嘅營養。

Text: Mami Editorial