BB特別黐媽媽？3個真相令媽媽超自豪

媽媽們有冇發現，明明BB喺日頭嘅時候，都唔會好黐自己，甚至見到自己出門都冇咩反應；但係一到夜晚，BB就會好似貼身膏藥咁黐到自己實一實呢？

1.想要被安撫

B未出世之前已經喺媽媽肚裡面住咗10個月咁耐；喺BB出世之後，媽媽仍然係會貼身照顧BB。只要BB一喊，媽媽總能夠第一時間憑喊聲知道BB想要啲咩而滿足BB，所以BB自然會認定只有媽媽可以滿足自己一切需要，更會想黐住媽媽多啲。

2.想要安全感

對BB嚟來說，媽媽嘅聲音同氣味係佢最熟悉。 喺夜晚要瞓覺嘅時候，周圍又黑又靜，同日頭時熱鬧嘅氣氛完全相反，睇唔到熟悉嘅事物，所以BB喺呢個時候會特別需要安全感令自己安心瞓覺，所以到BB夜晚就會黐實媽媽。

3.想要食物

親餵母乳嘅媽媽喺BB肚餓嘅時候，隨時可以畀BB食得飽飽。所以喺BB眼中，媽媽就係供應食物嘅來源，所以BB一想飲奶，就會黐住媽媽。

當BB夜晚想要媽媽陪嗰陣，媽媽應該及時滿足BB嘅需要，令BB感受到自己係被愛同重視。當BB大個之後，就唔會咁黐媽媽㗎喇！

Text: Mami Editorial