國際媽媽偷懶日 係時候做返呢3件事搵返自我

做咗媽媽之後，先知道原來每日都可以有數之不盡嘅工作要做，日忙夜忙，忙到連原本嘅自己係點都就快唔記得喇！話就話今日係國際媽媽偷懶日，但照顧BB嘅工作都一樣要做到足，唯有趁BB瞓咗覺，抽少少時間做呢幾件事，放鬆下自己，召喚返真實嘅自己出嚟啦！

1 沖泡一杯花茶

媽媽忙咗成日，唔只精神好攰，就連肌肉同神經都變得好繃緊，呢個時候最好沖返一杯花茶，望住靚靚嘅花瓣、聞住怡人嘅花香，煩惱都會一掃而空。加上不同花茶都各有功效，對媽媽嘅身心都有好處。

2.敷面膜

湊BB湊到疲態盡現，晚晚都攰到好似打完仗咁，一哄完BB瞓，媽媽都秒速撻落床進入夢鄉！有幾耐冇好好善待過自己嘅肌膚、睇真啲自己嘅美貌呢？一於用15分鐘敷返個深層滋潤或美白嘅面膜，掃走臉上嘅黃氣，摸住白白滑滑嘅臉蛋，心情都靚啲！

3.睇書／電影

偶爾犧牲少少睡眠時間，睇一本期待已久嘅書或欣賞一部有深度嘅電影，除咗可以擴闊媽媽嘅眼界外，亦可以令媽媽嘅心靈得到慰藉。細細品味作品嘅每一個情節同意境，足以滋潤已經枯燥得太耐嘅大腦！

Text: Mami Editorial