BB可以扶住嘢行 應該買學行車嗎？

當BB 10個月大左右，活動能力大增，可以開始扶住梳化或櫃邊慢慢行，呢個時候爸爸媽媽都會開始考慮入手一架學行車，原意係畀BB安全咁坐住車周圍走，但係又聽聞BB用學行車會影響BB嘅盤骨發展，而外國亦因好多學行車意外而禁止出售，究竟學行車係好係壞？有咩方法可以畀BB安全學行呢？

美國兒科學院認為BB喺學行車內基本上係坐，而唔會真正提腿行路，只係用好似撐船嘅動作推動車四畔移動。而呢啲動作只能夠強化BB嘅小腿肌肉，而訓練唔到行路最主要運用嘅大腿同臀部肌肉。所以學行車只能夠畀BB周圍移動，而唔能夠真正幫助BB學行路。加上有太多BB嘅家居意外都係由學行車引起，所以美國已全面禁售學行車。

1.請BB推著平穩嘅椅子向前進發

可以揀一張有返咁上下重量又平穩嘅椅子畀BB推住走，適當嘅重量令BB唔會因為推得太快而跌倒。

2.大人喺BB背後撐扶著BB向前走

爸爸媽媽可以從後捉住BB雙手，帶領BB向前行。

3.使用踏步車

父母可以為BB選購踏步車，踏步車可以畀BB練習平衡同向前蹬腿，大前提係BB可以自己企穩，先再嘗試用踏步車輔助BB學行路。

但如果爸爸媽媽因忙於處理屋企其他事務而需要將BB放喺學行車一陣，亦應該注意以下事項：

• 避免使用學行車連續超過10分鐘以上
• 學行車要喺成人嘅視線範圍內活動
• 先檢查學行車嘅構造，因為有啲車可能會容易摺起夾住BB
• 唔好畀BB坐學行車時移動得太快，以免翻側
• 留意BB嘅移動範圍會唔會有佢唔應該掂到嘅物件，如：桌面嘅物件（暖水壺、熱茶等），有機會被BB拉到枱布或撞到而跌到BB嘅頭上

Text: Mami Editorial

Source：衛生署