【5歲或以下小童免費 北角酒店Buffet】

北角都有五星級酒店？早排朋友約食buffet，見就喺公司附近，Happy Friday就蒲下頭啦！地點就喺北角碼頭旁邊，7月先開幕嘅海匯酒店Hotel VIC。

The Farmhouse無金碧裝潢，整體用咗earth tone設計，有梳化位又有露天位(暫未開放)，充滿田園氣息，反而更舒服。

食物方面，分開冷/熱兩大區，海鮮雖然無即開生蠔提供，但係選擇都豐富，有龍蝦、蟹腳、凍蝦、翡翠螺、青口同蜆。最緊要有refill，未見過吉咗。

旁邊刺身櫃都唔弱，魚生即點即切，有牡丹蝦、帶子、八爪魚、吞拿魚、三文魚，同幾款手握壽司，仲畀我發現有人點即開海膽做軍艦，我當然即刻都order一份！

後面個雪櫃仲有沙律、ham、煙三文魚同芝士，款式唔算多，但係都足夠。隔離竟然仲有即榨新鮮蔬果汁，有雪梨、甘筍、橙、西芹等等畀你任揀任mix，第一次見酒店buffet咁招積！當然飲品仲有coffee or tea同汽水。

熱盤區就喺餐廳最入面，長長雲石枱放滿中西東南亞菜，一入去就係石燒，有燒牛肉、串燒、羊架，每晚仲有煎法國鴨肝或者焗生蠔。

沿長枱行過去仲有唔同嘅即叫即煮，好似意粉、通粉、闊條麵、拉麵、河粉等等，將材料自己食幾多夾幾多交畀師傅，保證熱辣辣。

仲有個特大蒸籠，入面有各款中式點心，旁邊仲有燒味、水煮牛肉等等中菜。

但我覺得最正都係個燉湯，我去嗰晚係螺頭蟲草花！

最後去返甜品區，其實就喺一入門口，都係冷凍區就有部好大嘅旋轉雪糕櫃，閂咗門入面就會一直轉，開門就會停，望住佢轉好治愈。入面放滿Movenpick、Haagen-Dazs同牛奶公司雪糕杯同雪糕批。

旁邊仲有師傅即點即制crepe同waffle，仲可以自己DIY豆腐花，有得食又有得玩！雖然小件裝嘅甜品款式唔算多，但係賣相相當精緻，都有泡芙、Tiramisu同抹茶蛋糕等等。

*消費滿$1000以上可享3小時免費泊車    

仲有只要Like Hotel VIC FB/IG就可以獲得85折，優惠做埋9月咋！

可能因為5歲或以下小童免費，夾夾埋埋啲優惠真係好啱家庭客，同場大部份枱都有小朋友哈！

以五星級酒店嚟講，食物、環境、服務都好好，只係無其他大酒店嘅「排場」。就算你未有小朋友，想試下新場或者喺港島東搵地方gathering不妨一試！

是次小分享完畢，有興趣可按 麵語錄食玩遊記 by Aminn 或 C家重地 其他分享 :)

任何合作請接洽：[email protected] 

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Aminn

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！