BB都識睇人面色 憑表情判斷下一步行動

爸爸媽媽有冇發現，BB好鍾意眼定定望人？有時BB係拎起嘢放入口之前，或想行去某個地方之前，都會先望望你哋呢？原來BB係睇緊大人嘅表情同反應而決定自己嘅行動！

有好多項研究指出，BB由出世開始就對人臉最有興趣，特別係媽媽嘅臉，喺出生幾個鐘之後，已經能夠區分媽媽同陌生人嘅面孔。有實驗顯示，BB注視媽媽圖像嘅時間遠比其他女人嘅圖像耐。

由於BB特別鍾意注視人臉，可以透過長時間嘅觀察，令佢哋好快就可以學識分辨快樂同悲傷等等表達唔同情緒嘅表情，而且會根據呢啲表情而採取唔同嘅行動。到咗大約5個月大，BB就可以將快樂或悲傷嘅臉孔同聲音連繫起來；大約喺8至12個月大時，佢地就可以學識讀取臉部表情所帶嚟嘅資訊，去判斷應該點樣處理面前嘅情況。

例如，啱啱學識爬或行路嘅BB面前有一個斜坡時，佢哋會望一望媽媽臉上的表情，如果媽媽笑，佢地先敢向斜坡移動；如果媽媽唔笑同擰頭，佢地就唔會前進。面對新玩具亦係一樣，當BB見到媽媽露出可怕嘅表情，他們會躲避新玩具；但當見到媽媽笑，佢哋就會好開心咁拎新玩具玩。

喺BB眼中，任何事物都係新奇同有趣，佢哋亦唔識分辨危險同唔可以做嘅行為，所以其他人嘅臉部表情成為佢哋一個好重要嘅訊息來源。爸爸媽媽可以多利用臉上嘅表情去教BB咩係可以做、咩係唔可以做，但亦唔好過份保護BB，喺唔會令BB受傷嘅大前提下，應該盡量畀BB多接觸唔同事物，鼓勵佢哋勇於嘗試。

Text: Mami Editorial