4大長老湊B記 3個行為令父母啞然失笑

By rachel.lo on 04 Sep 2018

現今有唔少家庭嘅父母都需要外出工作，將BB交畀4大長老照顧。但隨著歲月嘅過去，好多時老一輩已經將當初湊BB嘅細節忘記得一乾二淨，唯有靠自己嘅感覺或親朋好友嘅建議去湊B，好多時會做出一啲令父母哭笑不得嘅行為。

1.幫BB著多件衫

喺長輩眼中，BB都係「弱不禁風」嘅小小人類，無論係冬暖夏涼，只要摸到BB嘅手仔腳仔凍冰冰，就會直覺係BB凍，然後不停幫BB著衫蓋被，務求要將BB包到實一實，令BB唔再凍為止！事實上，BB嘅心臟同手腳嘅距離相比大人遠，所以手腳會容易冰冷。如果想知BB係咪真係凍，應該摸BB嘅後頸，如溫暖嘅話就表示BB體溫適中，太熱或太凍嘅話，就要適量幫BB加減衣服嘅數目。

2.咩都畀BB食

本著「有福同享」嘅精神，好多時長輩希望自己有得食，BB都有份食，所以會將自己嘅食物同BB「分甘同味」，或者特登買啲小朋友零食餵BB。本來係出於一片好意，但係可惜BB人仔細細，器官未完全發育成熟，腸胃非常敏感。加上長輩好多時唔清楚BB邊啲食物係食得、邊啲係唔食得，有機會令BB食完後輕則會消化不良，重則會食物敏感、甚至中毒。所以，有啲爸爸媽媽見到長輩餵小朋友食大人嘅食物都會特別緊張，但長輩就會覺得「洗唔洗咁呀？」，有時會令雙方鬧不快。

3.口話唔好成日抱BB，轉過頭自己走去抱

成日聽人講話如果BB一喊就抱，就會縱到BB成日扭抱，所以長輩都會教爸爸媽媽唔好成日抱BB。好多時爸爸媽媽聽到BB喊忍唔住想抱嗰陣都會被長輩訓話；但當狠心唔抱嗰陣，長輩轉過頭就衝去抱起BB，完全係「今天的我打倒昨日的我」，令爸爸媽媽大感錯愕！其實BB喊係代表佢有唔同嘅需要，有時可能係生理上嘅肚餓、濕片或唔舒服，有時就可能係覺得不安、害怕、需要安全感，照顧者應該盡量滿足BB，給予適當嘅擁抱安慰。