孕媽媽腳水腫好難受 5個方法紓緩不適

每10個孕媽媽就有8個會有唔同程度嘅水腫，水腫喺孕後期最明顯，水腫主要係因為子宮脹大壓迫下身大靜脈，令血液循環減慢所致，水分會聚積喺腳面、腳踝、小腿、大腿，甚至外陰唇。呢種生理性嘅水腫對孕媽媽同BB都唔會有負面影響，會喺生完BB之後消失，所以孕媽媽唔駛太擔心。以下5個方法都對減輕水腫有一定幫助，各位孕媽媽不妨試下～

1.瞓前用枕頭墊起小腿，上下左右重複擺動雙腿

抬腿同活動可以令血液順利回流，緩解水腫。

2.盡量採用左側睡眠姿勢

建議孕媽媽瞓覺時朝左側躺，令靜脈血液回流，減緩水腫。咁係因為下腔靜脈喺右側，如果孕媽媽朝右側躺會壓迫到靜脈。

3.穿著舒適有彈性嘅鞋襪

喺日頭活動時穿著彈性襪會比較舒服，但係喺夜晚瞓覺時，最好除咗彈性襪嚟瞓。

4.飲食清淡

飲食方面亦唔好食太鹹，應食清淡啲，但亦唔好極端到完全唔食鹽，另外亦唔好因為水腫而刻意減低飲水量，應該保持返充足嘅飲水量，令新陳代謝可以順利進行。

5.溫熱嘅水進行足浴

可以幫助下肢血液回流，促進全身氣血循環。

Text: Mami Editorial

Photo Source:衛生署