【魚媽之人奶路分享坐月篇】

上回講完醫院篇【魚媽之人奶路分享醫院篇】，今次就到坐月喇！魚B係魚媽第一胎,出院後就同魚爸番屋企坐月。當初我幻想得十分之美好，休息⋯⋯休息同休息⋯⋯但非人既生活先正式開始!!!!!!!!!!!!!!

魚媽魚爸係新手父母，一心只係靠自己坐月，係三無！無長老幫、無陪月陪、無請工人..番到屋企既第一日，就開始照顧BB，除左不停地埋身餵奶，就係把屎尿片啦！初生BB食得密屙得更密，一日差不多8-10次便便，再加上母乳易消化，便便比較稀。好多次幫魚B換片，都會噴到一地黃金⋯⋯

經過醫院個幾日，魚B已經開始掌握到點樣啜奶，但因為初生BB一日會瞓好多個鐘，差不多每一次餵奶都瞓下食下，加上掃風換片時間已經用左接近一個半鐘，執番好D野，休息半小時，魚B又再愛的呼喚！

呢D畫面一日大概重覆又重覆 10次，一日24小時，其實係無可能有充足休息。係剛生產完元氣大傷既媽媽而言，真係好崩潰(傷口痛、子宮痛、腰痛等等等....)

當時身邊都有好多人建議我轉餵奶粉，好耳熟能詳既說話如下:
1)人奶咁水，邊夠飽架？ BB梗係喊啦！
2)攪咁耐食餐奶都唔知食幾多，你係咪唔識餵呀？
3)奶粉飽肚好多架，營養咪一樣咁好 !
4)你BB咁瘦既，你唔夠奶不如比奶粉啦...
邊個媽媽唔想舒舒服服咁湊大個BB，但知道母乳係對BB最好既，可以餵到點解要轉奶粉？

個段日子閉關育兒，已經長期休息唔夠，再聽呢一D說話，個心真係裂晒。魚B出世5.5LBS ，出院跌到得4.92LBS，佢係屬於XS BB。佢比較輕令到我呢個母乳媽媽都好大壓力，好擔心自己比唔夠奶佢。最後 BB 喊我又喊，BB便便多我又喊，BB啜小左奶我又喊，仲變成好多產後媽媽都會遇到既"產後抑鬱" 。
當時我覺得自己好似失左控一樣，而好彩魚爸0係我坐月既一個月佢都放左一個月假陪住我。每日都煮飯，煲湯，家務一手包辨，仲會幫我手同BB換片，沖涼等我有得休息。
坐月既日子我用恐怖黎形容，但諗番覺得好值得，亦係一個好好既經驗。因為以前3分鐘熱度既我為BB努力，堅持母乳到今日已經4個半月啦！

各位媽媽，母乳餵哺唔容易，但請相信自己可以！為母則強，請為自己拍掌！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Hey!魚媽媽

Photos：Hey!魚媽媽 & Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！