有閨蜜是福氣 3件閨蜜會陪媽媽做嘅事

做咗媽媽後，雖然同閨蜜見面嘅時間會少咗，但只要你有需要，佢哋都會隨時出現陪你一齊做下面3件事：

1.聽你傾訴

無論畀老公激嚫、定係分享BB各種大小事，閨蜜都會樂於默默聽你傾訴。即使閨蜜未做媽媽，有時可能未必明你講咩，但佢總可以同你一齊嬲、一齊笑、一齊難過，仲可以隨時講一堆最能夠安慰你嘅說話！有時啲唔可以同老公或家人講嘅說話，都有賴閨蜜做你嘅樹窿，令你唔駛屈埋一堆冤屈氣！

2.買好多靚嘢畀BB

男人通常都係好理性嘅生物，就算見到又平又靚、好似好啱BB用嘅，都分分鐘畀唔識欣賞嘅老公一句「有咩用？」呢盆冷水淋熄晒想買嘅欲望。但閨蜜永遠都係最可愛嘅小惡魔，只要見到靚嘅BB嘢，或見到邊到有BB用品大特價，都會立即同媽媽分享，甚至索性買埋送畀BB。媽媽同閨蜜出街買嘢總係最開心嘅，因為永遠都會聽到「買啦！買啦！」

3.構思BB嘅慶祝佈置

滿月、百日宴、生日等等嘅BB大日子，媽媽都會希望幫BB搞得好好睇睇，由著咩衫去到有咩佈置，媽媽都會絞盡腦汁，而通常老公都會冇咩意見，交晒畀媽媽全權負責。但當閨蜜一聽到BB要搞慶祝活動，就會勁興奮！唔單止同媽媽一齊做晒資料搜集，仲會落手落腳幫手佈置，直情當正媽媽嘅BB係自己嘅一樣。

如果各位媽媽身邊有呢位好閨蜜，一定要好好珍惜呀！

Text: Mami Editorial