6個護理初生BB臍帶要注意嘅事項

初生BB返到屋企之後，臍帶可能仲未脫落，由於肚臍同體內血管仍有關連，如果清潔不當，好易會引起發炎感染，所以爸爸媽媽一定要小心護理BB臍帶！喺臍帶脫落前後，都要注意下面6個事項（以下圖片可能會令人不安）：

1.保持臍帶清潔同乾爽

如發覺臍帶底部（即臍帶同肚皮連接嘅位置）有分泌物積聚時（如沐浴或換尿片後），就需要清潔乾淨。

2.清潔臍帶方法
用凍滾水整濕棉花棒，再清潔臍帶底部。每抹一次就要換一枝新嘅棉花棒，直至臍帶嘅底部完全清潔好為止，最後再清潔臍帶部分。請輕力口抹拭臍帶，千祈唔好太大力，以免令到臍帶受損或出血。

3.唔好將尿片包得太緊

應盡量將尿片包喺臍帶下方，或將覆蓋到臍帶嘅尿片部分摺一下，除咗可保持臍帶乾爽，亦可避免BB喺活動嘅時候，臍帶被尿片磨擦而出血。

4.唔好喺臍帶周圍塗藥物

千祈唔好用任何敷料包紮肚臍或塗任何藥物，如：油、膏、臍粉、膠布等。

5.少量血水滲出屬正常

當BB臍帶脫落時，可能會有少量血水染喺尿片上，呢個係正常現象。爸爸媽媽可以用凍滾水繼續清潔直至肚臍完全乾爽。大概2-3日後，傷口就會癒合，唔會再有血水滲出。

6.如果出現以下情況，請盡早帶BB去母嬰健康院或普通科門診/家庭醫生求診：

• 臍帶可能受感染的症狀，如：臍帶底部皮膚紅腫、有臭味或有異常分泌物
• 肚臍長出肉粒
• 當嬰兒啼哭時，臍帶或肚臍凸出
• 臍帶若有大量出血的情況，請立即前往急症室求診，讓醫護人員盡早替嬰兒止血及找出出血的原因。

Text: Mami Editorial