新手父母常犯3個沖調及餵哺配方奶嘅錯誤

做父母前，以為BB好易湊，只要畀樽奶佢就搞掂。直到BB出世之後，先知道原來餵BB飲奶都係一大學問，有好多細節需要注意！

1.唔好沖奶時先落粉後落水

明明平時沖咖啡、奶茶都係先落粉後落水，再用匙攪勻，點知沖奶粉就完全唔同晒！要先落水後落粉，然後用雙手輕輕轉動奶樽，直到奶粉完全溶化。爸爸媽媽都一定要按粉奶罐上嘅指示按比例加入水同奶粉，因為落多咗奶粉有機會令BB脫水，而少咗奶粉就會令BB唔夠營養。

2.唔好用低於70℃水沖奶

好多時我哋沖嘢飲都會隨意加熱水同凍水，溫度啱飲就得。但原來開畀BB嘅奶水溫度一定要超過70℃，咁係為咗殺滅奶粉中嘅細菌，之後可以用水喉水沖向瓶身降溫。

3.唔好餵BB飲放置超過一個鐘嘅奶

BB未必可以一次過飲晒一樽奶，爸爸媽媽唔想浪費嘅時候，會將飲剩嘅奶用熱水座熱，過一陣先再畀BB飲。但父母要注意，如果BB飲剩嘅奶已經放超過一個鐘嘅話，就要倒咗佢，唔好再畀BB飲，因為裡面嘅奶已經充滿細菌喇！

Text: Mami Editorial

Photo Source:衛生署