嚴重可危害孕婦胎兒生命認識妊娠毒血症

By rachel.lo on 24 Aug 2018

準媽媽通常沉醉喺孕育新生命嘅喜悅當中，每次去健康院做產前檢查都會好期待聽到BB嘅心跳，然而，產前檢查除咗跟進BB嘅情況外，亦會跟進媽媽嘅身體狀況。媽媽每次量血壓、驗小便，其實最主要嘅原因就係要及早應對令婦產科醫生最聞之色變嘅孕婦隱形殺手 - 妊娠毒血症。

妊娠毒血症，又稱為前兆子癎（pre-eclampsia），係一種不常見但嚴重嘅妊娠併發症，多發生喺懷孕中、後期或生產後。喺香港，每1千名孕婦當中就有1人會患上嚴重嘅妊娠毒血症，呢個亦都係導致香港孕婦身亡嘅主要原因之一。

如果孕婦有以下高危因素，會增加患上妊娠毒血症嘅機會：

1. 有糖尿病、血壓高或紅斑狼瘡症的病歷
2. 過往懷孕期間曾患有妊娠毒血症
3. 近親有妊娠毒血症的懷孕病史
4. 高齡
5. 是次懷孕與上一胎相隔十年
6. 懷有雙胞胎或多胞胎
7. 肥胖
8.第一胎懷孕

患有妊娠毒血症嘅孕婦會出現血壓上升、蛋白尿、嚴重水腫、嚴重頭痛、視力模糊或出現閃光、上腹疼痛、嘔吐等症狀。病情嚴重時可能會發生溶血反應、血小板過低、肝或腎功能衰竭、肺水腫或視力障礙。

呢個病嘅成因目前未明，研究多數認為係懷孕早期嘅胎盤發展異常所致。由於子宮血管未有隨着胎兒成長變粗，唔足以應付胎兒生長嘅養分所需。母體會收縮全身嘅動脈血管，以增加子宮血流去供養胎兒，因而導致身體血壓升高。但係，子宮動脈、胎盤血管同胎兒臍帶亦會一齊收縮，令胎盤嘅血流更少，胎兒得到嘅養分大減；而孕婦嘅肝、腎、肺部嘅負擔會加重，只有終止懷孕或早產胎兒之外，暫無根治方法，如果唔及時治療，會危害孕婦同BB嘅性命。