BB戒片大作戰 係時候同尿片講拜拜！

好多父母都會喺小朋友到2歲左右就開始為佢哋戒片，為入學做好準備！究竟應該點幫小朋友戒片好呢？不妨參考下呢個方法！

先準備以下物品：

1.買一啲可愛嘅兒童廁板，男仔嘅仲可以買多一個尿兜，顏色愈鮮豔愈好，可以吸引小朋友。

2.準備一啲教小孩去廁所嘅書籍同影片，可以向小朋友灌輸去廁所嘅概念，亦可以激發佢哋嘅模仿心。

3.準備戒片褲，可以承受少少尿液，畀小朋友有尿濕嘅感覺，佢地會知道急到咩地步會瀨，瀨咗又會有咩後果。

戒片作戰正式開始！

戒尿片初期，爸爸媽媽可以畀小朋友試下喺屋企著戒片褲，出街先著返尿片。 呢個時候，爸爸媽媽一定要有耐性，因為小朋友喺頭幾日會尿尿得好密，需要不停幫佢哋換褲！小朋友可能會不停講想尿尿，可能有時有尿有時無尿，但爸爸媽媽每次都要帶小朋友去廁所，俾小朋友習慣有尿意就要去廁所。

呢個時期，爸爸媽媽去廁所之前都要同小朋友講，甚至畀小朋友觀察自己點去廁所（男仔跟爸爸，女仔跟媽媽），因為小朋友好鍾意模仿大人，所以呢招效果都會好好。

每次小朋友成功去完廁所，爸爸媽媽都要稱讚小朋友，令佢有動力繼續自己去廁所。

當維持咗幾日，小朋友就會慢慢學識忍尿，可以兩三個鐘先去一次廁所。當小朋友連續好多日都冇瀨尿嘅時候，父母就可以試下畀佢出街都著戒片褲，不過要記得為小朋友準備後備褲。

然後，小朋友就可以同尿片講拜拜！

不過爸爸媽媽喺小朋友戒片嘅過程入面，一定要好有耐性同照顧小朋友嘅情緒。記住小朋友瀨濕褲係好正常，千祈唔好因為咁而鬧佢、羞辱佢，因為咁做可能會令小朋友反感同害怕。其實當小朋友心理同生理都準備好嘅時候，就可以輕鬆戒片，而大多數小朋友都可以喺3歲前成功戒片，所以爸爸媽媽亦唔駛太擔心。

Text: Mami Editorial