感受BB喺體內 3個時刻令媽媽最難忘

各位媽媽，仲記得當發現自己有咗BB嘅時候，係驚喜？感動？定係不安呢？相信媽媽們即使去埋診所做驗孕測試，手上拎住醫生發出嘅懷孕證明，都仲係會有一種非常唔真實嘅感覺。畢竟，身形依舊、懷孕嘅初期症狀尚算輕微，好多媽媽都會反覆自問：「我真係有咗？」隨著懷孕嘅日子增加，媽媽終於慢慢感受到BB嘅存在！以下3個初體驗，邊個最令媽媽懷念呢？

1.第一次聽BB心跳

媽媽喺確認懷孕後，會喺大概6至12周去私家診所或母嬰健康院進行第一次產前檢查。醫生會將胎心機放喺媽媽嘅肚皮上，然後放大聲效，同媽媽一齊聽BB嘅心跳聲，通常BB嘅心跳頻率會比成人快，聽住同自己心跳頻率截然不同嘅心跳聲，令媽媽確信體內有另一個生命存在。

2.第一次照超聲波

聽心跳可能未夠形象化，但係照超聲波嘅時候，就確確實實見到BB嘅全貌。喺9至12周第一次照超聲波嘅媽媽，會見到一個小小嘅胎囊，裡面就有一個小巧又可愛嘅BB喇！雖然唔係好睇得明，但當醫生解釋畀媽媽聽BB嘅身體各部分嗰陣，媽媽真係可以感動到喊出嚟！

3.第一次胎動

冇得照超聲波嘅日子，媽媽都會好掛住BB（雖然BB就喺肚入面但感受唔到），直到第一次感受到BB踢自己，媽媽就會非常興奮！除咗媽媽可以感受到BB之外，BB亦可以感受到媽媽嘅撫摸，大家終於可以互動喇！

Text: Mami Editorial