胎兒都會有情緒 靠胎動告訴媽媽3件事

懷孕18至20周起，大部分媽媽都會第一次感受到BB嘅胎動。胎動係指媽媽感受到胎兒喺子宮內嘅翻滾、踢、伸展等動作。其實胎兒喺大約12、13週嘅時候已經開始會郁，只係太細而未被媽媽察覺。有咗胎動之後，媽媽隨時都可以同胎兒互動，而媽媽嘅情緒亦會直接影響胎兒嘅胎動頻率，呢一項都係醫護人員了解胎兒狀況嘅重要指標，因為胎動可以反映出胎兒嘅情緒同喺子宮內嘅情況。

1. 寶寶肚餓

有研究指出，每晚9點至凌晨1點都係胎兒活動得最厲害嘅時間，呢個時候嘅胎動同媽媽體內血醣濃度降低有關，所以如果媽媽覺得胎動太厲害，有可能係胎兒肚餓而向媽媽抗議， 所以媽媽不妨起床食少少嘢或飲杯牛奶。

2.寶寶害怕

約24週胎兒就會開始有情緒。英國有研究指出當媽媽喺生氣或有壓力嘅時候，胎兒亦同樣會愁眉不展，而且伸手摸臉嘅次數亦會增加。研究人員相信係因為媽媽情緒唔好時，體內會分泌大量去甲腎上腺素，令血壓上升、胎盤血管收縮；胎兒亦會感受到媽媽皮質醇嘅變化，而作出相應舉動。所以當媽媽生氣嘅時候，胎動亦會突然加快，反映出胎兒嘅不安同恐懼。

3.寶寶唔舒服

如果一個原本活潑好動嘅胎兒突然變得安靜，又或者原本安靜的胎寶寶忽然變得非常躁動，媽媽就要有所警覺，呢個可能係胎兒缺氧嘅信息。雖然胎兒仲未出世，但是佢已經會諗辦法引起媽媽嘅注意，佢會為咗降低氧嘅消耗而突然變得安靜，就好似「生悶氣」；相反缺氧會影響到佢嘅中樞神經，所以會大發脾氣而躁動不安！

Text: Mami Editorial