想回到過去 媽媽想做又冇時間做嘅5件事

生咗BB之後，媽媽已經冇哂私人時間，連沖個涼都覺得好奢侈，有時夜晚默默洗奶樽嘅時候，都會好懷念少女時代嗰陣：想買就買、想瞓就瞓、想去邊就去邊⋯⋯但奈何現實係好多嘢想做但都已經冇時間可以做，以下邊項又係媽媽最想做嘅呢？

1.做Facial

生完之後長期冇得瞓又操勞，搞到個樣又殘、身體又疲憊，真係好想做個Facial喚醒下沉睡嘅肌膚，再做返個肩頸按摩鬆一鬆，諗起都覺得爽呀！但通常做Facial都要好長時間，而媽媽又唔可以離開BB咁耐，所以都係放棄。

2.去Shopping

著咗咁耐鬆身嘅孕婦裝，生完BB後身材又唔同咗！未有BB前嘅衫褲又著唔落，陀緊BB時嘅衫又太鬆身，真係好想買過一批新衫，不過諗到要帶住BB出街好難試衫，所以都係放棄。

3. 去旅行

有時見到身邊朋友出國玩，自己都會心思思想去旅行，但又唔可以放低BB唔理，帶埋BB去旅行又要帶好多野又辛苦BB，所以都係放棄。

4. 去戲院睇戲

期待咗好耐嘅電影終於上畫，成日都想抽時間去，結果電影由開畫到落畫，最後都係去唔成。

5.一覺瞓天光

由孕後期開始，可以一覺瞓天光變成媽媽每日嘅夢想，唔知呢個夢想幾時先可以實現呢？

雖然BB出世之後，媽媽忙起上黎都會懷念下以前輕鬆自在嘅自己，但望住呢一刻BB嘅得意樣，媽媽們都絕不後悔！更加想像唔到冇咗BB嘅日子！

Text: Mami Editorial