唔好再俾BB訓枕頭 3個初生BB嘅身體奧秘

要照顧初生BB，首先爸爸媽媽要知道初生BB嘅構造同成人上係有出入，所以千祈唔好將大人果套沿用返喺BB身上！反而要清楚知道BB嘅構造，小心唔好傷害到脆弱嘅BB呀！

1.冇頸曲位

BB嘅頸椎位呈垂直狀態，所以對BB黎講，平躺就係頸椎最自然舒適嘅姿態。目前歐美權威機構都明確建議BB一歲之前唔好用枕頭，因為用枕頭係會對佢地嘅頸椎造成額外的壓力。

2.囟門未閉合

BB額上有囟門嘅存在，囟門唔單止柔軟，有時仲可以睇到囟門上嘅皮膚會跳動，咁係因為囟門位無骨頭覆蓋，咁係為咗俾BB頭顱有發育嘅空間，而頭皮組織下面有腦膜、腦脊髓液同大腦結構，所以爸爸媽媽要避免BB嘅囟門受到外力撞擊。

3. 頸肌無力

初生BB嘅頭部佔全身嘅三分之一，頸肌仲係處於無力狀態。如果將BB豎直抱嘅話, 頭嘅重量就會全部壓喺頸椎上，會對BB嘅頸椎造成好大嘅損傷，甚至影響佢嘅生長發育 。

Text: Mami Editorial