BB打針大全有咩疫苗要考慮接種？

By rachel.lo on 16 Aug 2018

BB出世之後，媽媽都要開始定期帶BB打針，但原來除咗母嬰健康院會提供免費疫苗接種之外，私家診所都會提供額外嘅疫苗接種。所以，如果爸爸媽媽擔心政府嘅疫苗對BB嘅保障唔夠全面，可因應情況考慮帶BB去私家診所接種額外嘅疫苗！

現時衛生署提供香港兒童免疫接種計劃：

現時政府母嬰健康院嘅免費接種計劃並未有提供一啲高危致命嘅傳染病，包括輪狀病毒、乙型流感嗜血桿菌(可引致腦膜炎)、甲型肝炎等疫苗，而呢啲疫苗可以選擇喺私家診所為BB接種。

1.輪狀病毒

對嬰兒危險性最大，幾乎所有兒童喺5歲前都會感染輪狀病毒。輪狀病毒可以引起腸道病毒感染，造成發燒、嘔吐同嚴重腹瀉及脫水。嚴重嘅案例會造成一日20次以上嘅嘔吐或腹瀉。症狀通常會持續3到9天。輪狀病毒具高度傳染性，通常經由糞 - 口途徑傳播（例如攝取受污染嘅食物同水、接觸受到污染嘅玩具）。目前無任何藥物可治療輪狀病毒感染，所以接種口服輪狀病毒疫苗係最佳嘅預防方法。

2.乙型流感嗜血桿菌

乙型流感嗜血桿菌(Hib)係一種可以引致嚴重侵入性感染嘅細菌，尤其影響幼童。九成患者都係5歲以下嘅幼童。侵入性感染可導致多種嚴重疾病，最常見嘅病徵係腦膜炎，細菌入血亦經常同時出現。多個先進國家如美國、英國、德國、澳洲、加拿大等已將Hib疫苗納入全民保健疫苗計劃，而香港政府暫時未有將Hib疫苗納入免疫保健計劃內。現時5合1/6合1無細胞混合疫苗都加入了Hib疫苗，家長亦可安排小朋友獨立注射。

3.水痘

現時政府嘅接種計劃中，寶寶只會喺6歲先完成接種，喺1-6歲嘅保護未必足夠，如爸爸媽媽希望BB更早完成接種，可考慮市面上嘅四痘疫苗。水痘係由帶狀疱疹過濾性病毒(HZV)所引起，係兒童常見嘅急性傳染病，多發生在五至十歲的兒童身上。水痘令全身皮膚出現豆狀的水泡及發熱，而且水泡結痂後有機會留下永久疤痕。抵抗力弱人士有機會染上併發症如猩紅熱及肺炎，最常見是經人與人接觸直接傳播。