加固BB便秘心情唔好！3種方法幫BB容易排走便便

當BB踏入六個月之後，終於可以開始嘗試食唔同嘅食材！不過呢個亦係媽媽開始頭痛嘅時候，除咗每日要諗餵BB食咩之外，加固後嘅BB亦會比較容易出現便秘嘅情況，有時可以2至3日都冇便便。睇到BB成日想屙又屙唔出，個肚仔脹卜卜，BB又因為咁而成日忟忟憎憎，真係唔知點幫佢好，唯有日日祈求BB有便便！等到BB終於要屙便便，點知BB用力谷到流哂汗、辛苦到喊，先屙到一小舊硬便便，仲帶有一絲血，真係睇見都心痛！

為咗要解除BB嘅便秘之苦，各位媽媽不妨試下以下3種方法，幫助BB每日都輕鬆排便！

1. 多餵BB飲水

好多時加咗固嘅BB因為飲食習慣唔同咗，攝取嘅水量唔足以幫助腸道順速蠕動，所以便便就會繼續停留喺腸道，隨著停留嘅時間愈耐，便便嘅水分俾腸臟繼續吸收而變得愈黎愈硬，所以BB就愈難屙。

2. 多食高纖維食物

俾BB食多D幫助腸臟蠕動既食物同高纖維既食物，例如香蕉、火龍果等，不過由於火龍果核對BB黎講係好難消化，所以爸爸媽媽喺餵BB食火龍果嘅時候可先將火龍果嘅核盡量攪碎，或直接用細篩將核過濾，製成火龍果汁。

3. 幫BB按摩肚仔

媽媽可以先將少量橄欖油倒喺掌手，再雙手合十摩擦，直到雙手掌心都有熱力，然後喺BB肚仔用順時針嘅方法打圈按摩，呢個方法可以同時按摩腸道，幫助BB排氣和放鬆。

Text: Mami Editorial