即使會激嬲BB 爸爸媽媽都要狠心做嘅3個行為！

By rachel.lo on 15 Aug 2018

BB笑嘅時候係天使，喊嘅時候就會變成惡魔！身為爸爸媽媽，當然希望自己嘅BB係開心果，為左哄BB笑，爸爸媽媽通常都會扮低能，做哂醜怪動作去哄BB開心。不過當爸爸媽媽要狠下心腸去實行下面3個行為嘅時候，就算BB喊到拆天，都唔會輕易罷休！

1.餵BB食藥

當BB病得嚴重，唔可以單靠食療同休息好返嘅時候，爸爸媽媽唯有帶BB去睇醫生、餵BB食藥。有經驗嘅爸爸媽媽都知道，就算醫生講到BB嘅藥水又甜又有水果味都好，BB都絕對唔會中意食藥！仲一定會扭黎扭去、郁手郁腳咁喊住抵抗到底！通常喺呢個時候，爸爸媽媽都會好心軟，加上唔想自己成為BB心目中嘅衰人，都會互相叫對方餵埋落去。但最後都會變左一個負責捉實BB，另一個負責餵藥，最後雙雙變哂BB眼中嘅衰人。

2.幫BB吸鼻水

通常BB傷風感冒，最令爸爸媽媽擔心嘅一定係BB會鼻塞而抖唔到氣。加上BB太細個，根本唔識得自己將鼻涕擤出黎，所以通常爸爸媽媽都會用吸鼻器幫BB吸出鼻涕，將吸鼻器嘅一端對準BB嘅鼻孔，另一端就由爸爸或媽媽咬住，接駁完成後，爸爸或媽媽就要用口大力吸出BB嘅鼻涕。不過BB嘅鼻仔非常敏感，當吸鼻器一接近BB嘅鼻孔，BB一定會用力打走吸鼻器！呢個時候，又係要爸爸媽媽一個捉實BB，另一個負責吸。一路吸一路聽住BB爆喊咁掙扎，唔知仲以為係對BB施行緊滿清十大酷刑！完成吸鼻之後，BB可以暢順呼吸，但亦會嬲咗爸爸同媽媽。

3.餵厭奶中嘅BB飲奶

BB通常喺唔同時期會出現急速成長期或厭奶期，BB飲多咗奶嘅時候，爸爸媽媽可能忙咗但都會開心BB好胃口；但當BB厭奶而一整日都唔肯飲奶嘅時候，就會令爸爸媽媽好擔心又心急如焚！為咗令BB唔會脫水或營養唔夠，爸爸媽媽都唯有用盡方法威逼利誘BB飲奶，但通常厭奶B唔肯飲奶果陣都會堅守防衛，唔俾奶樽埋身！爸爸媽媽唯有軟硬兼施，同BB玩到放哂電，喺BB半睡半醒間先餵奶。