【對家人抑或是對客戶都要用心對待新手爸話你知做上班族同全職爸爸嘅5大分別】

By 梵高爸爸新手日記 on 13 Aug 2018

梵高初當爸爸的一刻開始，世界從此不一樣－由太太懷孕、寶寶出世、直至長大，我會盡力留下最珍貴的回憶，樂意伴她分擔照顧BB的使命，並跟其他新手爸爸互相交流

2018年1月2日，正式離開全職工作行列，打滾7年廣告界，返工朝九晚十一，離職時為數碼廣告公司高級客服經理。

以前返工，想有機會hea吓；依家湊BB，有時會懷緬返工的日子。以下係純反映我心聲同真實情況：

返工就算OT，都有放工的時候；照顧BB係無分日夜，要全天候stand by。寶寶一個多月，(純粹)餵奶掃風換片，但已經有點吃力，遲d仲要考慮埋，識轉身時的安全措施/加固食物。半夜瞓到熟睡之際，寶寶喊飲奶，就要用盡力起身沖奶，長期無法深層睡眠，其實體力上都辛苦。嗱...好彩湯丸BB夏天出世。如果冬天要喺暖笠笠被窩起身，仲慘慘豬
返工對客，都可以憑經驗值，fact-finding問到客戶的需要或面對的問題，然後提供解決方案。就算再差的客，ASAP類的都可以用timeframe壓佢，唔知自己要乜的客都可以俾reference去minimize understanding gap，賴貓的客都可以email black and white保障自己同公司；但湊B完全唔同，因為你唔知佢喊咩，你會想盡辦法或網上搵海量資料，都未必搵到solution，有時會好頹
返工壓力，作為team supervisor，來自續單率、簽單量、點達到合約的預期要求、團隊跟客戶的分歧 (其實我舊公司已經好好，同事夠young夠融洽，老闆對我有要求合理而信任我)；但湊B的壓力，是我好多事未必控制到，亦唔知stakeholder唸咩，甚至婆媳關係 (我算幸運，媽媽嫲嫲已經算好少)。以前KPI寫得清清楚楚，但依家無咩KPI可言，有時好無方向。
返工遇著無理的客戶，大不了收線後同同事爆炸放負，飲杯野呻吓；但湊B就算因疲於奔命而情緒不快，但只好啞忍，以免波及BB情緒。
超老土講句，返工湊客，就算差極，都係打份工，客戶term單對我損失不大 (當然我的心態絕對唔係咁)；但湊B，關係係一輩子，係血脈相連，要長期維繫，有問題要互相修補。

但無論如何，兩者有共通點，對客對家人一樣，只要用心付出，了解對方需要，對方係感受到的，亦得到信任，是錢買唔到的。
依家，基於我個人的職業道德，以及對舊公司的情意結，我唔會跟舊公司客戶有任何生意上合作或咨商，但我已經跟佢地成為好朋友，whatsapp問候/閒時飯聚/交換湊仔經/送禮物，一切都很有心。
BB第44日大，日積月累的磨合 (對客一樣)，開始摸熟BB脾性，佢亦喊少了。當我叫「湯丸仔」時，佢會轉個頭仔望住我，聽我講野，對我笑。簡單互助，簡單眼神交流，是愛。
共勉之。