母乳之路唔係想像中咁易行 在職媽媽泵奶必遇嘅3大困境

唔少在職媽媽重返職場後，都會繼續堅持餵母乳。不過，喺公司始終唔及喺屋企可以親餵BB咁方便，所以在職媽媽每日都要帶著一大袋奶泵、奶樽／儲奶袋、冰種同冰袋返工，呢D都唔算得上係D咩，但遇到下面嘅3個情況，就會令在職媽媽好頭痛！

1. 公司冇地方泵奶

雖然政府大力提倡餵哺母乳，但就唔係所有僱主都會支持，就算支持都未必有地方可以借俾在職媽媽泵奶，最後媽媽可能要喺午飯時間去有哺乳室嘅商場，如果附近冇嘅話，就要去洗手間泵奶⋯⋯呢個時候，媽媽通常都會好爭扎，明明想俾最好嘅BB，點知就要去充滿最多細菌嘅地方「製造食物」俾BB，都唔知仲俾唔俾BB飲好！

2. 夠鐘泵奶撞正開會

每日都預好時間泵奶，點知老闆喺你準備執野泵奶嘅時候就搵你開「長命會」，預咗冇返2個鐘都出唔到黎。一路開會，一路感受住乳房愈黎愈硬、愈黎愈脹痛；聽住老闆長篇闊論，但你個腦只係倒數緊乳房幾時爆炸。

3. 乳腺阻塞

終於等到夠鐘入房泵奶，原定半個鐘就可以泵完，點知泵到差唔多時間先發現乳腺塞咗，泵極都泵唔出，轉用手擠、按摩，硬塊都原封不動，但又超出原定時間，同事又拍門等用房⋯⋯呢個時候，在職媽媽唯有忍住痛出返黎，等放工再處理。

各位在職媽媽，你地又有冇遇過呢D情況呢？

Text: Mami Editorial