【咩都講以前以前 社會點會進步 張宇人侍產假言論激怒全港爸媽 莫非就咁由佢？】

單刀直入

張宇人：「侍產假一日都唔應該有！」

張宇人有阿媽生、有老婆、有仔女，今年都六十九幾歲人都唔知道家庭有咩需要，好可悲。

張宇人：「以前我哋太太都無產假！」

的確，上兩代人真係對生活任勞任怨，我嫲嫲1打5，到老嘅時候捱出個大病，我唔係想懶無產假，但當年「普通人」生活真係好艱苦。 到我媽咪生完我，我又無問過媽咪休息咗幾耐，不過喺我BB嘅時候，我就放咗去「湊仔婆」屋企住，喺入學之前我父母都係weekend parents。

無論邊個年代，為咗生活就要有啲取捨，但如果我作為小朋友，有邊個唔想痴父母多啲。奈何當年無乜勞工福利唯有硬食，無錯「人人都係咁㗎啦！」想當年，都30年前啦！

而張宇人嘅當年，起碼都40年前啦卦？

張宇人：「以前我哋無侍產假又點？」

講返侍產假呀～我好好彩生Aster時間咁啱喺農曆新年之前，老公公司已經率先有5日，佢自己再攞5日AL，跟住放埋新年假，都放咗3星期。 我諗張宇人應該無湊過自己啲小朋友，或者佢啲子孫後代都係「天生天養」咁利害！而家我哋生活條件好咗，對各方面嘅expectations都高咗，湊初生BB會有十萬件事要處理，頭一個月真係好L難搞！尤其對我哋本身係二人家庭嘅新手父母，簡直係驚天地泣鬼神。

拉返闊啲講呀～面對屋企新成員，父母需要適應，BB啱啱嚟到呢個世界更加需要適應！大人嘅生活會畀BB徹底打亂，半夜無覺好瞓is a must，如果你問我大概幾時上手，我可以話起碼要2個禮拜以上！

張宇人：「你以為7日佢哋會收手？7日就會有14日，14日就會有1個月、1年。」

老公幫咗我3個禮拜，佢返工之前我都要開始幫返手洗下衫、洗奶樽、換下片，坐月唔可以掂水咩嚟㗎？ 而家唔係要求老公都放埋產假呀～放得幾多得幾多，總之3日就係唔夠。無錯，7日都唔夠，14日都唔夠㗎喇！但係呢啲唔係苛索，係話畀你知而家社會嘅實際需要，因為知你脫晒節、知你無良、知你刻薄呀嘛！

張宇人：「佢哋永無止境嘅苛索，係唔會停喺一個位。」

隨住時代嘅進步，可以做到嘅福利條件多咗，已經有好多中小企嘅事實話畀大家知，增加員工福利係可以加強工作能力。如果老闆只係一心用減少開支去FF利潤，蔗渣嘅價錢永遠做唔到燒鵝嘅味道喎！幾廿歲人唔係唔知呀？

用蔗渣嘅價錢同福利應該都可以請到一支蔗嘅，再畀你壓榨變成蔗渣囉！

總結： 張宇人一路以嚟言論都咁爆，究竟佢係代表個人呀？代表飲食界呀？定代表商界去出聲呢？

Btw提提大家，張宇人係功能界別飲食界、自由黨主席、行政會議成員。

正所謂怨有頭債有主，各位商界、自由黨黨友，仲有林鄭月娥，唔該做啲嘢！

而家好似得吳秋北同田北俊出嚟抽水，勞工界呢？非建制呢？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Aminn

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！