【《BB來了》收視理想 黎諾懿同監製聯手游說想開續集 同大家經歷孩子成長入學階段】

大台熱門小品劇集《BB來了》收視成績理想，最高7天跨平台總收視達30.2點，創出2018年劇集首兩周收視之冠，而噚日監製廖晉碩就同劇中主角李佳芯、黎諾懿、高海寧、徐榮、楊卓娜及無綫高層杜之克、曾勵珍等一同出席祝捷晚宴。

黎諾懿（Lokyi）都無預計小品式劇集會有咁高收視成績，當據知劇中不少演員都話想拍續集時，諾懿就正同監製廖晉碩一同聯手游說高層開續集，希望續集係講「允豬」長大，需要面對入學考試問題，爸媽為孩子四出搵學校嘅嘢。

李佳芯（Ali）聽後都舉腳贊成希望可以一直拍落去，並講到劇集未播出前會感到害怕，因擔心角色成日發癲，但幸好觀眾明白，仲提到角色嘅對白好有共鳴添。

劇透結局

剩餘最後兩集，劇中各對情侶關係轉差，甚至大叫離婚，但有唔少網友都估最後會係例牌BBQ。

噚晚嗰集，講到「絕世好爸」致庭（黎諾懿飾）一夜之間成爆紅KOL，唔單止係屋企放滿鏡頭，就連允豬一歲生日都要變成商業化，搞到老婆恬兒（李佳芯飾）極為不滿，更認為致庭一切都係為錢而做戲，於是提出離婚，兼帶埋允豬返娘家。

阿妙個爛賭老公阿成（楊證樺飾）想要求同阿妙（楊卓娜飾）復合，但阿妙唔肯，阿成就認為係致遠（徐榮飾）問題，一怒之下就揮刀斬致遠，搞到致遠受重傷送院。阿妙得知之後，就在旁悉心照顧，當致遠傷勢好轉後就帶埋龍仔離去，致遠以為係阿媽（Madam Lo飾）搞鬼，質問後否認。

Text: Mami Editorial
Photo Source: TVB、《BB來了》截圖、myTVSUPER、Lokyi、Ali、徐榮@IG