【《BB來了》大解構 輕鬆小品帶出深層意義 劇集編審編劇親身解說結局最終亮點】

由上月初中開始播放嘅劇集《BB來了》 ，雖然唔係咩大製作，亦唔係咩大卡司演員，卻因題材夠貼地，觸動到唔少外婆、嫲嫲、新抱、奶奶、新手媽媽嘅心靈，成為本年度小品神劇。

唔經唔覺，哩套劇集踏入結局篇，剩餘最後三集，大家當然好期待結局會係點，係咪每對有情人都可以終成眷屬呢？回想最初編審Pinky原來係想寫畀一啲身為父母同子女嘅人，希望透過套劇而諗爸爸媽媽嘅諗法。

好多人最初睇都會誤以為成套劇會係歌頌媽媽有幾偉大，但係編審嘅心目中，會想係唔同嘅身份角度出發，好似由Madam Lo盧苑茵所演嘅奶奶角度；又或者係陳秀珠飾演嘅硬朗阿媽月蟬等等，畀觀眾有更貼身嘅感受。

未知大家仲記唔親得，自稱為「湊仔聖手」嘅月蟬，難得女大又做咗人媽媽，好聽啲嘅就叫做無咩牽掛，就倒頭繼續去追求自己嘅夢想，雖然年紀就已達黃昏，但哩一切都只係為咗證明自己仍然係有用之人，點知就連阿女恬兒都唔撐佢，係公園度流淚個一幕，而哩幕係最令兩位編劇眼濕濕，拍手叫好嘅場景。

最終嚟到結局戲肉，編審Pinky已經話畀大家聽，唔會有死人塌樓橋段，只有唔少感動場口，當中以允豬最為有突破。早前黎諾懿、徐榮同監製開直播時，都有話畀大家知，唔計初生個BB允豬係有5個，計埋就6個，後來有網友留言話其實有7個，正當大家都覺得奇怪嘅時候，編審同編劇就話你知，原來第7個允豬唔係真人仔允豬，但哩個假允豬好貴，而且像真度幾何亂真，仲會係第19集（星期四）個度出現，大家記得落足眼力啦！最終結局入面，允豬仲會有個小小嘅特別設計場口，會令成個局面扭轉，叫大家必定要留意。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text: Mami Editorial
Photo Source: TVB、《BB來了》截圖、myTVSUPER