【感謝另一半、家人、朋友嘅支持 10個令媽媽堅持餵哺母乳嘅原因】

作為一個3分鐘熱度既表表者~可以堅持到餵哺母乳半年，其實係一件好大既成就 :p

今日我想分享一下，有乜原因可以令我撐得過塞奶既痛，堅持落去！

有時只係一句好簡單既說話，真係會俾到無限既動力！

1. 母乳對BB既好處

係選擇餵母乳前，一定要好好了解母乳對BB有咩好處~

簡單啲講，BB係6個月大前，母乳都可以提供BB一切既營養！而且仲可以提供抗體俾BB，無咁易病~

有興趣了解既朋友，我之後會寫返一篇簡易版俾新手爸爸同4大長老睇 :p

2. BB既滿足樣(醉奶樣)

每次蠔豉妹妹埋身食完奶嗰個滿足樣真係可以俾到無限既動力我！

3. 我係唯一既供應商

無錯！呢個係獨市生意！得我呢個供應商可以供母乳俾蠔豉妹妹飲 :p

無人可以取代我~

加上，每次埋身餵人奶都係一個connection！

4. 對自己身體既好處

餵母乳，唔只對BB好，對自己都一樣好好~

例如，可以減低有乳癌、卵巢癌既風險~幫助子宮收縮~減少產後大量出血和貧血的情況~~

5. 老公支持

生之前我就同左老公講一定、一定、一定要全力支持我！

其他人如果唔知餵母乳有乜好處，我老公會好努力咁解釋~

加上每次佢幫我用樽餵蠔豉妹妹人奶時都會口up up咁話妹妹好幸福，有媽媽奶飲~話媽媽奶係世上最好既奶~

每次聽到我都好開心！係一個大大既鼓勵！

6. 屋企人支持

我媽媽同奶奶都一樣支持我！

佢地會問陪月姨姨點準備上奶茶、上奶湯~

雖然有一期蠔豉妹妹每2個鐘就要食一次奶，佢地都有好婉轉咁問我係咪唔夠訓、飲太少水所以影響奶量~~

不過同佢地解釋完有猛長期後，佢地又好似好明咁~

連我阿爸到後期都知人奶要座溫水加熱，唔可以以高溫加熱~又知道冰箱嗰間除左人奶外乜都唔可以放~我就知佢有默默支持我 :)

7. 朋友支持

有時出街、去旅行，少不免要係餐廳到一路食飯一路泵奶...

有時未必去既地方有哺乳室，好彩大家都好明白，又會讓一個隱蔽啲既位俾我坐~泵奶期間，大家都係照正常咁傾計、食飯~

其實有條餵奶巾遮住，都無人知我做緊乜~~

8. 公司支持

公司人少少，老闆又明無理由要係廁所泵奶，所以都安排左meeting room俾我泵奶用！

有時開internal meeting又撞正要泵奶既時間，阿頭都會好醒咁話休息15mins~

又或者我都試過出聲問同事介唔介我用餵奶巾坐係角落泵，大家都一樣無介意，又唔會用奇怪既目光望我。真係好多謝佢地！

9. 媽媽gp鼓勵

有時真係媽媽先會明媽媽，所以係塞奶同情緒低落既想放棄既時候，媽媽gp會分享有咩舒緩方法，又會互相鼓勵~

10. 其他人既支持

係我塞奶既期間我睇過助產侍同醫生，佢地都超級鼓勵我！明我塞奶有幾病、幾絕望。

佢地都會話我知，母乳係係重質唔重量！就算得一啖都有一啖抗體~所以唔需要迫自己有幾多奶量，太過注示奶量而令自己有壓力...

仲有，唔好以為3姑6婆講野無傷害力，我自問係一個正面人！不過聽到啲人話阿女好瘦，我啲奶無營養時真係想喊出黎...不過，大部分人知我餵人奶都會好正面咁叫我加油~我都好開心！

————————————

最後，大家要記住，母乳媽媽同奶粉媽媽都一樣係好媽媽！唔需要比較~每個家庭都獨一無二，請尊重大家既選擇 :)

天下大部份爸媽都會願意為子女獻上最好~大家，共勉之~

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos :Pig Wing

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！