【睇《超人特工隊2》學習分工 畀爸爸一個準備同實習機會】

《超人特工隊二》：給豬隊友一個機會

彈弓女俠與超能先生，是工作與家庭的隊友。十年前後，其實都一樣，超能先生即使力量無窮，但都是豬隊友，上集要老婆仔女救他，今集又被嫌棄每次行動有破壞無建設，彈弓女俠以柔制剛反而更有用，最終超能先生要做湊仔公，老婆就出外搵食。超能先生才發現平時老婆全職在家湊仔女，難過打怪獸。唔識教個仔做功課、唔識排解個女青春期的疑難、唔識氹阿B乖乖瞓覺，連阿B自己出了門口打架都不知道，在港媽眼中，超能先生是正宗豬隊友。

不過幾豬都好，超能先生都好錫老婆，見她難得能重操故業出外闖，便幾辛苦都頂住，不告訴老婆自己的苦況（不過港爸如果整親阿B唔講畀老婆聽，恐怕都是死罪了），更守得雲開，家中的難題一一能解決，最後還與老婆拍住上救人。這裡不禁讓我反思「豬隊友」這回事。

媽媽們認為老公是豬隊友，最常見原因是那男人對湊仔湊囡一竅不通。尿片包到漏屎、奶咀放在BB脷底、抱BB抱到雞手鴨腳……此等場面一出現，媽媽們便看不過眼，個口一直罵老公，隻手就搶回BB自己照顧。問題來了，為甚麼手殘的爸爸一直會是豬呢？就是欠缺練習機會啊！女人生完仔，特別有母性不再講，坐月期間日日夜夜對著BB、照顧BB，有陪月又可以由朝看對方示範到晚，那女人在照顧BB方面比老公優勝不足為奇。要怪就怪香港男士侍產假真心少，感覺是象徵式給你放三幾日就算，根本不是家庭為本的政策，沒有想到男士在新生兒來到後，如何實踐其家庭角色，減輕女士患上產後抑鬱的機會同時，亦給自己做爸爸作一個準備與實習。

你看超能先生，做家庭主夫做到揦手唔成勢，但因為自己有時間，並且是子女們的長期照顧者，不是大嗌一聲老婆便出來救駕，立即就有了捲起衫袖想解決辦法的態度，在碰釘中與子女溝通，找出自己一套妥善照顧子女，與子女相處的辦法。現實中，未至於要辭工，只要爸爸在老婆生仔後能有時間多點在家，在老婆未能活動自如的坐月期間，多點認識湊仔是甚麼一回事，一同參與建立起爸爸媽媽作為BB照顧者的過程，自然情感上與實際上都更能擔當起爸爸這個新角色。就算爸爸對大著肚的老婆愛護有加，始終他都未有經歷過十月懷胎，未有感受過BB在肚裡踢自己的連繫。對媽媽來說，BB是由驗孕棒出現兩條線開始與自己互動，而爸爸，實際上要到BB出生見到面才有互動。這十個月的落差，其實很大。

而最重要，是要在湊仔上信任另一半。我們覺得他豬，因為他沒有跟著我們的方法洗奶樽、包尿片、執出街用品……但其實會否，他的方法也沒有錯呢？會否真的是媽媽自己太緊張呢？正如孩子成長，不放手不跌倒不會走路，其實要老公成長至一個爸爸，不放手不犯錯不會當爸啊。只要BB安全，其實媽媽們真的可以讓爸爸自由發揮，讓他都能享受初為人父的快樂與辛酸，明白老婆下的緊箍咒背後的原因與理念，而不只是硬生生地跟著指示做，仲要嫌麻煩。

電影中的奸角指，超級英雄出現令人類倚賴他們，失去了自己求生的能力，所以要去除超級英雄。放在家裡，其實超能媽媽的出現，也令爸爸無法解鎖其照顧BB的技能。不如就兩公婆好好溝通，分配好照顧BB的工作，就算老婆主力做，爸爸自己都要識做，才能一家人齊上齊落啊。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 港媽的第二生活

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！