【由朝到晚湊住BB 成個人攰到一個點 研究：媽媽唔夠瞓會影響育兒質素】

生咗第一個，有埋第二件之後，筆者同太太開始發現自己同「周公」嘅關係越來越疏離，尤其太太每晚都要埋身餵母乳，「一覺瞓天光」對媽媽黎講真係奢侈過奢侈品。而唔夠瞓就會唔夠精神，第二朝又要返工，有咗小朋友就連「補眠」都唔係自己控制嘅「核心內圍」，返工同湊小朋友自然變得混混噩噩，攰到個點係會自己都唔知自己做緊乜。

係人都知唔夠瞓做乜都事倍功半，咁究竟媽媽唔夠瞓又會唔會影響到佢湊小朋友呢？

早係2007年就有研究發現，媽媽嘅睡眠質素會影響她們的心情及壓力，但好多時因為照顧小孩要面對同處理嘅問題或事情太多，「媽媽夠唔夠瞓」呢件事，好容易被忽略。

最近，一個伊利諾伊大學，對年齡介乎11至18歲的孩子與其媽媽作研究並發現，原來媽媽唔夠瞓，會令佢哋對孩子不守紀律時嘅處理會過份寬鬆，或對小孩做錯事時的教導及懲罰不一致；唔夠瞓嘅媽咪，佢哋嘅孩子會較常覺得「做錯事媽咪完全無罰我」、「我想要乜媽咪都唔會拒絕」及「叫我做嘢都唔知我做咗未」等等！

負責這項研究的學者Kelly Tu就指出，睡眠質素低會影響媽媽身心健康甚至日常生活，令媽媽容易發脾氣，集中唔到精神去處理孩子的問題。當媽媽唔處理孩子的日常紀律問題時，孩子長遠就有更大可能發生有風險的行為問題；較嚴重的如濫藥或犯事等等。

Kelly提醒父母要更重視自己的睡眠質素，父母通常會做好多嘢去幫小朋友入睡，但就忽略了自己的睡眠質素，這其實最終亦有機會影響到孩子。瞓得好啲嘅小tips包括睡前不要喝含咖啡因的飲品，不要做劇烈運動，不要用智能電話，建立固定的睡眠時間等，都可以增加睡眠質素。

所以，當見到媽媽們行為怪異，成日好似就發脾氣就發脾氣咁，千萬要「別怪她、別怪她」，不如問下「佢係唔係唔夠瞓」，如果係就幫下手湊下小朋友，俾佢同「周公」會一會，可能事情已可改善了！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : Scientific Papa

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！