【終於到左開刀時間背脊打麻醉藥係又痛又痺】

By LQY BB on 11 Jul 2018

我係新手媽媽, bb 女2個半月, 因為臀部響下面(胎位不正),所以38週左右就開刀開刀生, 希望同大家分享政府醫院開刀程序, 坐月食療,上人奶同婆媳關係等等

終於到左開刀時間了，會早一日入院檢查，主要係再睇下個頭有無轉位，有就可以返屋企等，係屬於無轉位哈哈，即係叠埋心水等開刀！

問左護士大約幾點開刀，佢只係答到早上OR 下午，我就係早上，但佢話如果前面有緊急開刀case，就會延後。

唯有叫家人第一段探病時間黎等(QE 開刀老公係無得陪產的)，即係12-1PM。第2段係5-8PM，前一晚要開始禁食禁水，果日既上午9點多，護士就黎叫我換衫，插尿喉(第一次整係好緊張，一開始唔舒服，不過只要放鬆 D，好快就會習慣)好快就過床推我去手術室了。

冰冷既手術室太約有5,6個護士做準備，醫生就響隔離等，狀態好輕鬆，咁我心諗應該都係有唔少經驗既哈哈哈！

跟住就過床插量心跳，一切正常就開始響背脊打麻醉藥，係又痛又痺。我就唯有同護士講2句分散注意力，佢講笑話你咁都忍唔到痛，好在而家開刀，順產點算？

打完無耐佢就叫你郁下腳趾，因為我之前爬文有個媽媽試過麻醉藥未到定未夠，隻腳趾一直郁到，開刀後要補麻醉藥，所以我就有警惕，我就話我腳趾仲郁到AR，唔好開始住，不過護士話好快就郁唔到，咁我真係隔左幾秒下半身就郁唔到了。

綠布一架起, 就知一切準備就緒，最大感覺係佢不停好大力按我胸口，由上推向字宮，應該就係推個BB出黎，無耐就聽到ar 囡喊聲了！護士幫佢抽痰，因為佢響我右邊既一張床仔幫佢抺身，所以我係見到佢抺身既過程，望住佢眼淚不期然流出，果一刻既眼淚有開心，有懷孕既壓力釋放，但又有黎緊要面對初生BB 既壓力，所以係好複雜既情緒！

好快護士就抱過黎俾我，而我肚既傷口處理得7788，就會將BB 放落心口，推去一個觀察房休息，期間我心跳好慢同血壓低，但我感覺完全無問題，反而果度既護士比較惡，唔俾我摸BB，叫我休息，我完全唔想休息，只係一直望住BB，搞左成個鐘，我同佢講其實未懷孕之前心跳都係偏慢同血壓低，而護士見我無咩問題，就叫護士接返我去待產房了。

去到房門口已經見到老公同媽咪等緊我，佢地見到我咁精神同BB 都鬆一口氣，呢度唔係電視劇果D 家人響產房門口等，一生完就有護士抱BB出黎俾屋企人睇(呢個係我一直以為既事)。

好快就嘗試俾BB 食人奶，但其實果陣我係未上奶的，因為知道母乳在第一周雖然分泌的少，但是新生兒的胃容量和食量也小，所以不需要擔心母乳無法滿足新生兒的需求，所以我就無特別補奶粉俾BB 食，但到第3,4日BB 體重趺左10%(其實呢個係基數低，跌磅計返%就會高，如果個B 一開始係8,9磅果D，就算佢跌返)唔俾出院，唯有補奶粉，但我想堅持，主要係驚佢食左奶粉會唔食人奶，所以都係俾補少少。

期間護士話我人手擠都係得少少，咁就用針筒入住先，好慶幸有個護士長勸左我2次「你用電泵LA，唔好再用針筒LA」我失敗感太重了，就去左搵佢叫佢教我用電泵，真係唔同嫁，所以就算果刻未上奶，BB 可能未識啜，除左用手擠，就真係好用電泵，就算無都好，每邊等佢吸15-20分鐘，等大腦知道要做野LA，我一開始2邊夾埋吸左半個鍾，都係得10ML左右，係就係好沮喪，但懷住媽媽一定會有奶俾BB 食既心態，就咁每3個鍾就去吸一次。