爸媽放小朋友喺第1位 排自己喺最尾 衣食住行 全部永遠都係小朋友先

有咗小朋友之後，爸爸媽媽自己就咩都無所謂，最緊要小朋友健康同埋開心，就已經好心滿意足。大家有無留意到，你地嘅生活已經比小朋友全面顛覆？

衣

小朋友就季季換新裝，最型仔嘅爸爸同最靚靚嘅媽媽，自己嘅打扮都只會排喺第二。過時過節，小朋友就一定要準備新嘅衫褲鞋襪，而自己就有時間先睇下買唔買，比起做媽媽前，無所謂得多。

食

有小朋友嘅你，係咪經常包底，食餸頭餸尾？

因為大家想留最好嘅比小朋友食。等佢地食飽飽，或者食唔晒，先到大人執手尾，食啲凍晒嘅嘢。

住

屋企已經比小朋友嘅玩具霸佔晒大部份位置，梳化同地面佈滿玩具，而且仲有大大張BB飯櫈，同埋大大張地墊劃分左佢地嘅遊戲區。

行

週末同埋放長假嘅時候，去邊度玩，去邊度食，都係搵啱小朋友去嘅親子好去處。

衣食住行都被小朋友包圍，原因只有一個，因為每個小朋友都係爸爸媽媽嘅小寶貝～

Text: Mami Editorial