返工≠風流快活 工作家庭難以兩兼顧 5大在職媽媽心聲有誰知

每個媽媽都想陪著仔女成長，奈何生活問題，不得不從反職場，但隨著孩子每日長大，媽媽真係可以工作、家庭兩兼顧？非也！在職媽媽五大心聲，你又知幾多～

由朝到晚都正在工作，感覺打兩份工

在職媽同全職媽嘅分別就係唔使全天候對住小朋友，但係咪就係旁人眼中較為輕鬆呢？其實唔係。試諗吓，每日一大朝早起身返工，盡自己最大嘅努力做晒要做嘅事，然後準時放工（但係香港邊份工真係可以準時收？）好了，真係收到工，返到屋企就要去長老們家中／暫托等地方接回小朋友，回到家就準備晚餐，同小朋友沖涼、Check功課、氹瞓覺、執屋等，到真係瞓上床又已經到凌晨時份，瞓得幾個鐘又要起身，每日都好似打兩份工咁，你話攰唔攰？

每朝出門口都要趕頭趕命
在職媽要返工，除非係同長老們一齊住，否則小朋友就好自然要交到其他地方，如長老們家中、幼稚園、托兒所等等，為免小朋友瞓醒肚餓扭計，媽媽必先要係出門之前餵飽小朋友，但小朋友唔係食得快，又要換衫，搞掂孩子後又要搞自己套衫，最終都係是旦求其著件套裝就算數，唔求靚，只求唔似個癲婆就已經好好了。

身在公司 心念孩子
做咗媽媽心中一切都以小朋友為先，如果臨收工仍未完成手頭上工作，就要提早打電話問老公可唔可以幫忙接回小朋友，又或者同長老們講一聲要遲啲先可以接到。

最無奈嘅事莫過於在職媽係工作期間收到電話，聽到小朋友突然感冒生病，但又不能離開工作崗位時，真係內心焦急又自責；此外，幼稚園因傳染病問題而突然停學，在職媽更是無助，有機會因此而要向公司臨時請假，抱著歉意將手頭上嘅工作交由同事們幫忙。

職場霸凌 進退兩難

相信有唔少媽媽都曾經試過／聽過，最初驗到有咗BB，而要同老闆講時，絕大多數老闆口頭上都係會講話「恭喜你，做人媽媽啦！」等等嘅說話，但之後都會講如果唔舒服就提早打返公司，好讓有同事幫手跟進，如要去產檢嘅話，就要提早完成工作才可以。

而產後再重返職場找新工作，更有機會被問到：「如果家中／孩子有事，會揀工作定請假呢？」所以職場霸凌好多時都係針對準媽媽／媽媽。

賺錢永遠唔夠洗錢快
媽媽重返職場，最大嘅原因都係希望公一份、婆一份，然後將好生活帶畀孩子，但事實上卻事與願遺，尤其係托兒問題，交畀長老們照顧，當然可以慳到，若然長老們唔願意湊呢？搵托兒中心、請工人姐姐等都係要用錢，當小朋友返幼稚園，用費就更加多。

Text: Mami Editorial