世界盃即將開鑼 仲追捧碧咸就Out啦！同你細數5位現役球壇嘅型爆好爸爸
講到足球，好多人都會諗到「萬人迷」碧咸，皆因少女鐘意佢夠靚仔，媽媽級嘅就鐘意佢夠愛家庭，但自佢退役之後，唔少女球迷都少左個型男睇，但原來係現役球壇裡面，都仲有好多型到爆而且係愛家庭、愛錫仔女嘅球星好爸爸～
基斯坦奴朗拿度 (Cristiano Ronaldo)
國籍:葡萄牙 年齡:33 效力球隊: 皇家馬德里
繼碧咸之後，最多人鐘意嘅莫過於美斯（Lionel Andrés Messi）同基斯坦奴朗拿度（Cristiano Ronaldo，C朗）。而身為五屆金球獎得主的（C朗）除了球技一流之外，其樣貌身材亦十分出眾，雖然係多年前曾傳出過不少緋聞，但當女友生咗小朋友之後，就已經收心養性，仲不時係網上社交平台上載家人同樂嘅相片添～
巴查(Marc Bartra)
國籍: 西班牙 年齡:27 效力球隊: 貝迪斯
來自西班牙嘅型男巴查（Marc Bartra），曾效力巴塞羅拿，但後來又輾轉去到德甲球隊多蒙特，現效力於貝迪斯。佢唔似得C朗咁有出眾嘅球技，但就有端正嘅輪廓，所以每次出席公開場合時，都會吸引到大批嘅女性目光。
馬治斯奧 (Claudio Marchisio)
國籍:意大利 年齡:32 效力球隊: 祖雲達斯
向來都有出產型男嘅意大利國家隊，現時就有最為人熟識嘅馬治斯奧，皆因佢擁有一對迷人又攝魂嘅藍眼睛，而且又係球隊嘅核心成員，所以深得球迷喜歡，再加上佢不時都會係社交媒體上發佈生活照，與老婆、囝囝們嘅互動相片等等，女球迷絕對不比男球迷少。
占士洛迪古斯 (James Rodriguez)
國籍: 哥倫比亞 年紀:26 效力球隊: 拜仁慕尼黑
James早係上屆世界盃時已一舉成名，有1.8米高，擁明星般嘅樣貌，令佢曾係皇家馬德里創下48小時內賣出34萬件球衣嘅記錄，甚至有球迷將佢同C朗作比較，可想而知，佢嘅外貌同魅力有幾咁出眾。唔單止咁，佢一有時間就會帶埋家人一齊去旅行，抽時間陪愛囡玩，係現今球壇上數一數二嘅靚仔爸爸！
艾利臣比加（Alisson Becker）
國籍: 巴西 年紀:25 效力球隊: 意甲球隊羅馬
艾利臣比加（Alisson Becker）光睇樣可能會覺得「佬」味極重，但可以話畀大家知，現年嘅佢只有25歲（1992年出世架！！） 今年仲係首次代表國家隊出戰世界盃，擔任守門員一職。平時佢除左練波之外，另一個嗜好就係湊小朋友啦，睇佢單手抱著氹小朋友瞓覺同幫小朋友沖涼嘅相，就知佢有幾熟手。
Text: Mami Editorial
Photo Source：Cristiano Ronaldo、Alisson Becker、James Rodriguez、Marc Bartra、Claudio Marchisio@IG
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
