【擺百日宴本應開心都變成心痛 B囡擺宴家人抱住滿場飛 瞓都無得瞓】

5月22號，係我個女100日大喇！好多人會係100日搞返個百日宴賀一賀佢，當然我都唔例外，同bb搞左個百日宴。百日宴主角當然係bb啦～好多人都黎祝賀佢，最開心都係佢既麻麻爺爺、公公婆婆，見到個孫女咁可愛趣緻，都忍唔唔住抱住佢周圍比人睇。

因為我搞百日宴係係夜晚，8點先開始，其實平時bb 6點幾7點就開始訓，所以係百日宴個陣，7點半左右就已經開始扭眼訓，但呢個時候屋企人影相影得好開心，就算扭計都係哄一陣，喊住咁影相。開始食野個陣，佢都訓左一陣間，但好快又醒左，又要食奶，因為我餵人奶，所以佢一餓就搵間房去餵奶，加上又成日喊，我都只可以不繼抱佢希望佢會訓到，基本上，我成晚都係無咩點食野⋯⋯

最記得係有段時間，佢扭得好勁，喊左20分鐘都訓唔到，我搞左好耐，哄左好耐佢先肯唔喊食奶奶，差唔多成半鐘有多先哄到佢訓，我抱返佢出去訓bb車，轉個頭見到豬隊友竟然帶住佢周圍比人睇，其實我真係明佢係主角，大家都好想見佢，但我辛辛苦苦先哄到佢訓，我真係唔想佢再醒，因為我知道佢已經攰到極限。試諗下你好眼訓，但人地唔比你訓／嘈住你訓，你都會好炆啦！個一刻，我真係好想好想喊，一黎bb喊，好多時都係我媽媽同我自己去哄佢，豬隊友無咩點幫手，二黎我見到佢眼訓無得靜靜地咁訓真係好心痛！！！作為媽媽，子女既感受我會放第一位，見到佢喊左咁耐仲要比人帶住周圍比人睇，而我咩都做唔到真係好嬲自己！

百日宴完左之後，bb返到去訓到變左隻豬咁，平時朝早7點會醒，個一朝，訓到11點先醒一陣，晏就又繼續補眠，見到呢個情況，我真係肉都赤埋，想像唔到個晚到底佢有幾攰⋯⋯

不過見到咁多人慶祝佢100日大，其實都好開心既，只係唔希望咁細個小朋友就咁辛苦姐。如果大家都要搞百日宴，個日日頭真係盡量唔好安排活動，比bb訓多陣，休息下，就算夜晚搞，都唔會令佢地咁辛苦。而我百日宴個朝，奶奶個邊有好多野搞，bb無咩機會休息，由朝踩到尾，中間又訓得好少。

Anyway，bb 100日快樂同辛苦晒你喇！

.

（如果大家對蛋糕、汽球同攝影師有興趣可以inbox問我架！因為我搵既都係好平，可以推介下比大家，哈哈哈哈）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 90後P牌媽咪

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！