【今時今日咁嘅服務態度係唔夠？！話你知行街電話無電可搵商場服務急救】

當年華仔嘅廣告金句「今時今日咁嘅服務態度係唔夠㗎！」，轉眼就16年，今時今日又有幾多人會真心欣賞好嘅服務？

早排有日去海港城做嘢，喺client嘅counter企咗幾粒鐘，期間已經覺得對腳好攰，收工嘅時候諗住去coffee shop坐下先返屋企，點知發現電話只係剩低30%電，「算啦～去飲杯嘢坐一陣好閃喇！」

搭緊扶手電梯嘅時候，諗緊而家好多商場都有叉電位，我知道海港城有個顧客服務中心，細細個我就成日嚟寄存行李㗎啦！(偷笑)

海港城個顧客服務中心早幾年裝修過，去到門口竟然見到入面有位坐嘅？咪住，要去問返個叉電先！原來而家海港城直頭有「尿袋」借，不過就要按金$300(現金)，好彩我撳咗錢，唔係就一場空歡喜啦！

望到而家個服務中心裝修到咁靚，我忍唔住入咗去參觀。而家除咗有自助行李寄存櫃之外，原來入面仲有幾張枱凳，同靠窗嘅一排梳化。

•  自助行李寄存
租借費用: HK$10 / 每兩小時 (小寄存櫃); HK$20 / 每兩小時 (大寄存櫃)

旁邊仲有報紙，而最離譜嘅係部自助飲品機！唔止得冷熱水，仲有black coffee同cappuccino，真係好fit佢哋顧客嘅需要！

而佢哋其他顧客服務站都會有以下服務
•  哺乳巾借用服務
•  急救設備
•  本地傳真 / 影印服務
•  輪椅及嬰兒車借用
•  郵輪船期及資訊
•  失物及認領
•  手提電話電池充電服務
•  縫紉針線包供應
•  雨傘及雨衣借用

其實而家大型商場都有好多估佢唔到嘅「服務」，部分客戶服務櫃枱都會貼出所提供嘅「服務」，或者可以上網搜尋「商場服務」，都可以知道邊啲商場提供邊啲服務㗎！

真係要再講多次，雖然商場服務係免費提供，但係用時用千祈唔好濫用，先至發揮到客戶服務最貼心嘅意義呀！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : Aminn

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！