【萬聖節2026】香港15大親子好去處！免費派糖、嘩鬼巡遊、LEGO英雄任務

萬聖節就快到啦！ 今年香港萬聖節氣氛特別濃厚，連香港旅遊發展局都首次推出「香港萬聖月」，聯同各區商場、景點及文化機構舉辦變裝派對、街頭表演同特色活動，令整個10月都充滿節日氣氛！想帶小朋友 Trick or Treat 拎糖果，又或者第一次參加萬聖節巡遊？今次 MamiDaily 精選 15 個香港萬聖節親子好去處，包括免費攤位遊戲、LEGO 創意體驗、兒童巡遊、南瓜工作坊同大型主題裝置，幫爸爸媽媽一次過安排萬聖節行程！

#1. 香港科學園｜毛神神嘉年華2026！戶外寵物嘉年華＋領養日＋新手養狗體驗班

今個萬聖節，帶小朋友去見吓可愛毛孩！「毛神神嘉年華2026」將於10月31日至11月1日登陸香港科學園，集合戶外寵物嘉年華、寵物領養日及新手養狗體驗班，最方便係呢幾項活動都可以Walk-in參加，毋須提早報名！

就算屋企未有養寵物，都可以帶小朋友近距離認識毛孩，透過領養資訊及新手養狗體驗，了解照顧狗狗嘅基本知識，從小學習愛護動物同負責任飼養。

活動資料

• 日期：2026年10月31日至11月1日（星期六、日）
• 時間：中午12時至晚上7時
• 地點：香港科學園戶外場
• 活動內容：戶外寵物嘉年華、領養日、新手養狗體驗班
• 參加方法：Walk-in，毋須預先報名

#2. 旺角 MOKO 新世紀廣場｜40+ 商戶萬聖節糖果尋寶

今年 MOKO 最吸引係可以玩商場版 Trick or Treat！小朋友扮成可愛小鬼怪，巡遊商場超過 40 間商戶，講聲「Trick or Treat」就有機會拎糖果。

商場仲設有尋找隱藏南瓜任務、鬼魅紋身工房，以及晚上嘅嘩鬼巡遊。啱晒想帶小朋友第一次體驗萬聖節派糖文化嘅家庭！

• 日期： 2026年10月21日至31日

• 糖果尋寶： 下午3:00–晚上9:00

• 嘩鬼巡遊： 下午6:00–晚上10:00

• 地點： 旺角 MOKO 新世紀廣場

• 收費： 商場免費入場（指定體驗參加條件以主辦方安排為準）

#3. 尖東麼地道花園｜免費萬聖節攤位遊戲＋派糖

想搵戶外萬聖節嘉年華，可以留意尖東「Halloween Beats」！現場有免費互動攤位遊戲，小朋友完成挑戰有機會獲得小禮物，仲有兒童 Beatbox 表演同年輕 DJ 演出。

一家人可以換上萬聖節造型，參加 Trick or Treat、欣賞表演，再逛鬼馬市集，感受節日氣氛！

• 日期： 2026年10月17、24及31日

• 親子嘉年華： 下午4:00–下午6:00

• 地點： 尖沙咀東部麼地道花園

• 收費： 免費攤位遊戲（市集消費及部分服務另計）

#4. 元朗 YOHO MALL｜50人嘩鬼巡遊＋南瓜工作坊

元朗嘅媽媽可以留意 YOHO MALL！商場將舉辦大型嘩鬼狂歡祭，50 名舞者組成萬聖節巡遊隊伍，帶來熱鬧表演，小朋友仲有機會一齊加入巡遊。

另外有南瓜車尋寶、搗蛋南瓜工作坊同面部彩繪，結合動手創作、尋寶同節日打卡，多種體驗一次玩！

• 日期： 2026年10月30日至31日

• 嘩鬼出巡： 下午6:00 及 晚上9:00

• 南瓜車大搜查： 下午5:00–晚上9:00

• 地點： 元朗 YOHO MALL（巡遊由 YOHO MALL I 主廣場出發）

• 收費： 免費入場（工作坊參加條件待確認）

#5. 青衣城｜6米巨型 UFO＋星際糖果任務

萬聖節唔一定要南瓜同鬼怪，今年青衣城反而玩外星人主題！商場設有 6 米高巨型 UFO，小朋友可以化身星際探險家，參加糖果任務，仲有外星人巡遊及 UFO 造型無人機表演。

特別適合鍾意太空、外星人同科幻故事嘅小朋友。

• 日期： 2026年10月9日至11月1日

• 無人機表演： 10月25及31日 下午3:00、下午4:00

• 外星人巡遊： 10月24日 下午3:00–下午5:00；10月30及31日 晚上7:00–晚上9:00

• 地點： 青衣城 1 期及 2 期指定活動區

• 糖果任務： 適合 5–12 歲兒童（須由成人陪同，每團開始前 15 分鐘於指定位置報名）

• 收費： 免費入場（禮品及活動名額有限）

#6. 大圍圍方｜香港鬼怪百物語＋角色巡遊

想感受有香港特色嘅萬聖節，可以去圍方！商場將本地鬼怪傳說融入萬聖節，設有多個主題場景，包括巨型狐仙等奇幻角色。

指定日子仲有角色見面會、巡遊同霹靂舞表演。小朋友可以接觸香港民間故事，不過部分鬼怪造型可能會令年紀較細嘅小朋友害怕，建議家長先睇吓現場佈置。

• 日期： 2026年10月2日至11月1日（部分活動至 10 月 31 日）

• 角色巡遊： 10月24、25、30及31日 晚上6:00–晚上8:00（10月31日延至晚上9:00）

• 地點： 大圍圍方 L2 中庭及其他指定活動空間

• 收費： 主題裝置免費參觀（特定換領活動設條件）

#7.西九文化區｜LEGO HERO-WEEN 英雄萬聖節派對

LEGO 迷一定會鍾意！西九文化區藝術公園秘密花園變身英雄基地，佈滿萬聖節 LEGO 佈置及打卡牆。小朋友可以領取英雄任務卡，完成 4 個挑戰、收集印章，換領限定小禮物。

仲有 LEGO 創意拼砌、小英雄快閃表演及魔術表演。最期待係 10 月 31 日嘅小英雄巡遊，小朋友可以着住英雄服裝參與，同其他小英雄一齊挑戰巨型糖果寶箱！

• 日期： 2026年10月15日至31日

• 重點體驗： 10月24、25、30、31日 下午5:00–晚上9:00

• 巡遊及糖果寶箱： 10月31日 下午6:00–晚上7:30

• 地點： 西九文化區藝術公園秘密花園

• 收費： 免費參與指定英雄任務（禮品數量有限）

#8. 將軍澳 The LOHAS 康城｜萬聖 Zombie 化妝＋兒童闖關

如果小朋友鍾意挑戰任務，The LOHAS 康城就有萬聖節「喪」玩基地！小朋友登記成為「康城小將軍」後，可以參加 Zombie 主題化妝、鬼馬闖關同鬼怪角色見面活動。

同普通打卡裝置相比，呢個有更多小朋友可以親身參與嘅環節，適合鍾意玩遊戲嘅家庭。

• 日期： 2026年10月24日及31日

• 時間： 下午3:00–下午6:00

• 地點： The LOHAS 康城 3 樓中庭

• 收費： 商場免費入場（活動須按指定登記安排參與）

#9. 將軍澳 PopCorn｜Trick or Treat＋萬聖舞快閃

想帶小朋友感受熱鬧萬聖節氣氛，可以去 PopCorn！商場有萬聖舞蹈快閃、鬼怪互動同 Trick or Treat 活動，指定晚上仲有 DJ 派對。

特別適合鍾意音樂、跳舞同節日表演嘅小朋友。家長可以安排先喺 The LOHAS 參加日間遊戲，再視乎小朋友精神同體力，決定晚間會唔會去 PopCorn。

• 日期： 2026年10月24、30及31日

• Trick or Treat： 下午6:00–晚上9:00

• 舞蹈快閃： 晚上7:00、晚上7:45 及 晚上8:30

• DJ 派對： 10月30及31日 晚上7:00–晚上9:00

• 地點： PopCorn 1 期 1 樓中庭

• 收費： 免費入場（糖果及禮品數量有限）

#10. 中環萬聖狂歡祭｜大型怪獸彈床＋親子變裝

今年中環都加入萬聖節狂歡！遮打道於指定日子變成萬聖節活動場地，設有大型充氣彈床、變裝及節日互動元素，讓一家大細走出商場，感受戶外街頭嘉年華。

小朋友最期待嘅充氣彈床設有不同身高票種，呢個項目需要額外付費，唔好誤以為全部免費。

• 日期： 2026年10月24及31日

• 彈床場次： 10月24日 中午12:00–晚上9:00；10月31日 下午2:00–晚上9:00

• 地點： 中環遮打道

• 彈床票價： 身高超過 120cm 兒童 $200；不足 120cm 兒童連 1 位陪同成人 $300

• 年齡限制： 適合 2–12 歲、身高至少 90cm 兒童（不足 120cm 須成人陪同）

#11. 尖沙咀海港城｜小巫師魔法學院＋10間商戶派糖

海港城今年變成期間限定「巫」奇不有學院！小朋友可以化身見習小巫師，挑戰 5 大特訓課，包括觀察力、創意、邏輯推理同反應能力遊戲，完成任務收集印章換禮物。

指定日子仲可以參加 Trick or Treat，帶住糖果換領卡走訪 10 間參與商戶收集糖果，玩足一個下午！

• 日期： 2026年10月9日至11月1日（逢星期五至日及公眾假期）

• 魔法學院： 中午12:00–晚上8:00

• Trick or Treat： 10月24、25及31日

• 地點： 尖沙咀海港城海運大廈地下中庭

• 費用： 換領任務成績表須捐款 $50 予公益金，或出示符合要求之即日單一消費收據

• 派糖參加方法： 須成為 HARBOUR CITYZEN 會員及持有效電子通行證

#12. 荃灣南豐紗廠｜免費怪奇動物展＋昆蟲導賞

想萬聖節玩得有教育意義？南豐紗廠今年推出「奇蟲物語」，邀請香港昆蟲教育及科普中心，展示多種罕見動物，包括非洲侏儒鼠、老爺樹蛙、帝王蠍同幽靈竹節蟲！

除咗免費參觀，週末仲有免費導賞，認識動物習性及自然生態。10 月 31 日更加有兒童奇蟲變裝 Catwalk，小朋友可以用昆蟲或環保主題服裝登台，發揮創意。

• 日期： 2026年10月10日至11月1日

• 免費展覽： 中午12:00–晚上7:00

• 免費導賞： 週末及公眾假期 下午2:00、3:00及4:00（每節約20分鐘，即場排隊）

• 兒童 Catwalk： 10月31日 下午3:30–下午5:00（$30／位）

• 地點： 荃灣南豐紗廠六廠地下

• 收費： 展覽免費；鬼口水工作坊 $180、面部彩繪 $30–$100（其他指定活動另計）

#13. 屯門黃金海岸商場｜Truck-or-Treat 糖果車隊

今年黃金海岸商場有個幾特別嘅玩法——Truck-or-Treat！小朋友唔係逐間舖頭拎糖，而係去到經過萬聖節裝飾嘅車隊旁邊，體驗外國流行嘅糖果車尾箱派糖文化。

同場仲有 MiniMaker 兒童市集、糖果尋寶大巡遊，啱晒鍾意車仔、戶外草地活動同 Trick or Treat 嘅小朋友。

• 日期： 2026年10月31日

• 地點： 屯門黃金海岸商場草坪

• 重點體驗： Truck-or-Treat、兒童市集、糖果尋寶巡遊

• 收費： 商場免費入場（個別活動登記、消費條件及時段以主辦方公布為準）

#14. 愉景灣｜親子 Cosplay 巡遊＋萬聖節市集

想感受更有外國節日氣氛嘅萬聖節，不妨去愉景灣！愉景廣場及愉景北商場設有多組萬聖節打卡裝置，晚上亮燈後更有節日氣氛。

10 月 31 日仲有 Cosplay 巡遊、市集同寵物主題活動。家長可以幫小朋友準備簡單服裝，一家人影相，感受戶外節日派對。

• 日期： 2026年10月10日至11月1日

• 打卡裝置亮燈： 下午5:30–晚上11:00

• Cosplay 巡遊： 10月31日 下午3:00–下午5:00

• 萬聖夜市集： 10月31日 下午2:00–晚上9:00

• 地點： 愉景廣場、愉景北商場及指定巡遊區域

• 收費： 公共打卡區免費（巡遊參賽及個別活動條件需另行確認）

#15. 紅磡黃埔天地｜奇裝巡遊＋萬聖節糖果大放送

黃埔天地今年有玩具收藏特展，集合唔同年代嘅經典動漫與玩具收藏品，啱晒父母帶小朋友一齊睇，分享自己童年玩過嘅玩具。

萬聖節正日及 11 月 1 日仲有 Trick or Treat 奇裝巡遊，女巫、吸血鬼等角色喺商場出沒，同小朋友互動派糖。對於唔想跨區、又想簡單感受萬聖節氣氛嘅家庭，幾適合安排放學後或週末去玩。

• 玩具特展： 2026年10月23日至30日 中午12:00–晚上8:00

• Trick or Treat 巡遊： 10月31日至11月1日 下午3:00–下午6:00

• 地點： 紅磡黃埔天地時尚坊 MTR 層及指定範圍

• 收費： 商場免費入場（派糖安排以現場為準）

text:mamidaily editorial