【新春攻略】最新2026 利是公價表！封$50成趨勢？保安/外傭派幾多？

By Twinkie Lau on 13 Feb 2026

農曆新年將至，各位媽媽準備好利是封未？每年呢個時候，最頭痕一定係「利是入幾錢」！最近網上流傳一份 2026 最新利是公價表，引起家長群組瘋狂討論。有網民直指受通脹影響，今年 $20 利是似乎已經「拿不出手」，基本入場費都要 $50 起跳？除咗親戚保安，Play Date 同學仔同家傭又應該封幾多？即睇最新行情，等你派得大方又唔會傷荷包！

1.保安、鄰居、普通朋友

• 建議公價：$20-$50

曾幾何時，兩封 $20 加埋都有 $40，叫做不過不失、見得下人。但嚟到 2026 年，通脹猛於虎，唔少網民直言 $20 已經「拿不出手」，只會留返俾公司大兜亂，又或者係一年見唔到一次嘅點頭之交。有媽媽更喺網上大呻中伏經歷：「試過派 $20 俾樓下看更，轉頭見到佢面口黑過鑊底，心裡勁難受！今年寧願慳自己都要入 $50！」睇嚟 $20 嘅生存空間真係買少見少！

2.公司同事

• 建議公價：$50

既然 $20 驚被人嫌棄，咁 $50 就自然成為咗 2026 年嘅「基本入場費」。勝在夠「穩陣」，對於要派幾十封利是嘅家庭嚟講，$50 絕對係喺「禮貌」同「保住荷包」之間攞個平衡嘅最佳選擇。

3. 親戚、好朋友、直屬下屬

• 建議公價：最少$50-$100（根據親疏），未結婚的兄弟姊妹大多封 $500或以大利是！

對於比較親嘅親戚、由細玩到大的好友仔女，或者公司直屬下屬，多數人都會預備 $100 或以上。所謂「親疏有別」，俾多啲係一份心意同祝福。當然，如果係未結婚嘅兄弟姊妹，甚至會封 $500 或 $1000 大利是，寓意大家新一年都發發發！

4.外傭姐姐

• 建議公價：$100 - $500 (視乎年資及表現)

講到家中重要的「幕後功臣」，一定係日日辛勞嘅工人姐姐！由煮飯洗衫到照顧小朋友，可以話係半個屋企人。農曆新年正正係表達謝意嘅最佳時機，封利是絕對唔可以馬虎！對於新入職或者表現中規中矩嘅姐姐，兩封 $50 或 $100 (共 $100-$200) 係基本尊重，多謝佢過去一年嘅付出。但如果係做咗好多年、又係「神隊友」級別，建議直接封 $200 至 $500 大利是！呢封稍微「厚」身少少嘅利是，其實係當作一份「年終花紅」，係對佢哋付出最大嘅肯定。

5. Play Date同學仔封幾多？

新年期間約埋一齊 Play Date，面對一大班小朋友，到底封幾多先啱數？

• 建議公價：$20 - $50 (視乎熟絡程度)

如果只係普通同學仔，$20 兩封 (共 $40) 其實已經足夠表達心意，旨在大家開心，小朋友有封利是揸手就得。如果係經常約出嚟玩嘅「鐵腳」，或者對方家長平時好照顧你小朋友，不妨考慮入 $50，顯得大方得體得嚟又唔會令對方有壓力要回禮。最緊要係大家事前有共識，或者觀察下其他家長做法，避免「差價」太大就得啦！

派利是心態：講心唔講金！

其實派利是原意係「派福氣」，各位媽媽量力而為就得，真正嘅祝福，是傳遞給對方的祝賀，教識小朋友收利是時要雙手接過兼講多謝，呢份家教比起利是錢更加珍貴！