【澳門好去處】澳門夏日親子遊消暑攻略！7米LABUBU/打卡愛麗絲夢遊仙境/人氣自助晚餐

暑假就到，想一家大細衝出香港但帶住小朋友又唔想搭飛機，去澳門盡情玩番轉啦！其實澳門除咗美食同購物，仲有好多適合一家大細嘅好去處㗎！即睇夏日消暑一日遊玩樂攻略，等大人同小朋友都玩得盡興、滿載而歸！

今次為大家探咗路，發掘咗一個集打卡、美食於一身嘅夏日消暑旅遊攻略！ 由愛麗絲仙境嘅夢幻場景，到超可愛嘅巨型公仔打卡位 ，再到自助山嘅人氣自助晚餐，又可以影多啲家庭合照，創造好多開心又難忘嘅回憶！

澳門夏日親子遊第一站：愛麗絲夢遊仙境主題打卡位

澳門上葡京綜合度假村係一個匯聚咗奢華酒店、頂級餐飲同多元娛樂嘅綜合度假勝地。原來呢度仲有個超靚嘅地方，就係3樓嘅綠茵勝境花園，近日變身成愛麗絲夢遊仙境，一踏入就好似跌入咗童話世界咁！裡面有齊巨型蘑菇、兔子花朵時鐘、撲克牌士兵同紅心皇后，仲有樹籬迷宮添！ 鮮豔嘅色彩同夢幻場景，絕對係小朋友嘅放電天堂，媽咪們影相都影到唔捨得走呀！記得要透過花園嘅鐵藝拱門影埋中央穹頂，靚到好似明信片咁添㗎！

澳門夏日親子遊第二站：嘉樂酒吧 意式經典下午茶

打完卡係時候去嘆返個精緻下午茶補充能量啦！Palazzo Versace 澳門嘅嘉樂酒吧意式經典下午茶真係睇得又食得，三層Tea Set每層都充滿驚喜！ 嚴選魚子醬、鵝肝、龍蝦等矜貴食材，最後仲有即席製作嘅清新檸檬雪芭，為味蕾帶來清爽享受！ 喺咁靚嘅環境享受美食，媽咪們都可以好好放鬆一下，同小朋友分享美味時光！

嘉樂酒吧意式經典下午茶
地址：Palazzo Versace 澳門地面層G13號（酒店入口）

價錢：$888/2位
搭配兩杯招牌咖啡或茶以及無限量供應Ferrari氣泡酒

澳門夏日親子遊第三站：超Cute巨型Baby Molly+CRYBABY+LABUBU

爆紅嘅Baby Molly、CRYBABY、DIMOO及LABUBU好受大人小朋友歡迎，今次4大人氣角色登陸澳門，仲全部都巨大化添！嚟到澳門，點可以唔同佢哋影相呢？Baby Molly喺瘋堂斜巷、CRYBABY會喺白鴿巢前地現身、DIMOO就會出現喺崗頂前地，而想搵LABUBU就要去氹仔排角路休憩區。其中LABUBU裝置仲有成7米高，打卡必到！如果你係色彩控，瘋堂斜巷仲有好多色彩鮮豔嘅葡式建築，粉紅色、黃色嘅屋仔都好值得打卡㗎！

澳門夏日親子遊第四站：自助山人氣自助晚餐

玩到攰攰哋，係時候去歎番個豪華晚餐！ 位於澳門上葡京嘅「自助山」真係名符其實，啲嘢食多到好似座山咁高呀！熱食，到精緻甜點、各種飲品同水果，通通應有盡有！仲有新鮮海產包括龍蝦、奄仔蟹、蝦、白蜆、原條黃花魚等，全部即點即煮，無限量供應！可以滿足晒一家大細嘅胃口，小朋友都可以搵到自己鍾意食嘅嘢，食到捧腹而回！

自助山餐廳
價錢：
(2025年7月1日-9月30日)
晚市自助餐（已包括無限量即叫即煮海鮮）
星期一至四：成人 - 澳門元788 / 小童 - 澳門元394
星期五至日及公眾假期：成人 - 澳門元878 / 小童 - 澳門元439

地點：澳門上葡京西翼三樓308號（酒店入口）

澳門夏日親子遊第五站：澳門上葡京

同小朋友玩足成日，一日來回實在太chur？不妨考慮喺澳門上葡京住返晚啦！酒店嘅豪華套房設計高雅，推開房門就見到寬敞嘅客廳同睡房，仲可以望住窗外嘅醉人景色！臨瞓前同小朋友浸個泡泡浴，絕對係治癒身心嘅最佳享受！ 瞓醒覺叉足電，聽日又可以再去探索澳門其他地方喇！

澳門上葡京豪華套房
立即預訂：https://bit.ly/4eEwaw4