【想多啲人奶 係咁狂泵竟係錯？想成功埋身餵母乳 先要學識佛系餵奶】

相信各位準媽咪其中一個最留心既一個課題就係母乳餵哺。今日就同大家講下如何可以輕鬆埋身成功。

首先大家要先了解到底我地既奶奶係點運作既先。

我地既奶奶係一樣好神奇既事。唔知大家有無聽過養魚論？

你想一條魚大啲你就要不斷換大啲既魚池比佢，佢先會不斷成長變成大魚。

而人奶都係，如果你想啲奶越來越多嘅話你就必須要排空所有乳汁，你既乳室就會比訊息個大腦「喂喂喂，啲奶奶比人食哂啦！你下次要造多啲奶奶黎BB先夠食咖！」於是下次就會有更多奶奶出現，黎到呢到大家係咪急不及待咁想去買個奶泵呢？你聽埋我講先啦！

雖然泵盡哂啲奶出黎會越黎越多奶奶，但係我地又要諗一諗...到底我地係咪真係需要咁多奶奶？

我大肚既時候都曾經係坊間聽過好多錯誤嘅母乳知識。

聽人講就算埋身，都需要買個泵，係每次餵飼完之後就用泵將多餘嘅奶汁泵出來，咁先會上奶。但其實呢樣野係錯咖！

其實岩岩出世既嬰兒胃部只有波子既size.食得少係好正常，千祈唔好以為係唔夠奶就走去泵出黎。

你要知道當過多既乳汁係你乳房到而寶寶又食唔哂既話，其實係好容易有乳線炎...你會覺得好硬，好痛，好谷，於是為求個胸變返鬆..你就會選擇泵返出嚟，於是乎大腦就會接收訊息，再造多啲奶奶出黎..不斷泵出嚟嘅情況底下，你啲奶奶就會越來越多，然後就會不斷重複以上動作..喂-痛-泵-喂-痛-泵..

有超過一半既新手媽媽都係因為長期係乳線炎既情況底下選擇左放棄人奶..

你會問...咁到底點先可以輕鬆咁埋身呢？

其實答案好簡單-只要你學識佛系喂奶。

佛系喂奶

唔飲上奶湯水 唔洗計飲左幾多 唔洗泵出黎

緣份到左自然會上奶

千祈唔好同人比較人地喂到幾多，因為個個bb食量都唔同..只要有足夠既濕片就得咖啦。

總之佢餓就喂。唔洗限時，密密啜，自然會上奶，亦做到供求平衡，輕輕鬆鬆埋身。

其實喂人奶真係好爽好方便咖，對BB都好有益...希望各位媽咪都可以比個機會自己試下，可能會一試愛上呢！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 僑蛋媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！